ప్రారంభానికి నోచుకోని ట్రాఫిక్ సిగ్నల్ 

దిశ, కుత్బుల్లాపూర్: రోడ్డు ప్రమాదాల నివారణతో పాటు ట్రాఫిక్ సమస్యలను పరిష్కరించేందుకు అల్వాల్ ట్రాఫిక్ పోలీసుల సూచనతో సిగ్నళ్ల ఏర్పాటుకు ఉన్నతాధికారులు శ్రీకారం చుట్టారు. ఇందులో భాగంగా అల్వాల్ ట్రాఫిక్ పోలీస్ స్టేషన్ పరిధిలోని దూలపల్లి ఎన్టీఆర్ విగ్రహం, జీడిమెట్ల గ్రామంలోని గాంధీ బొమ్మ వద్ద ట్రాఫిక్ సిగ్నళ్లను ఏర్పాటు చేశారు. అదే విధంగా పాదచారులు రోడ్డు దాటేందుకు కొంపల్లి లోని ఎన్సీఎల్ కాలనీ వద్ద కూడా లక్షల రూపాయలు వెచ్చించి సిగ్నలింగ్ వ్యవస్థను ఏర్పాటు చేశారు. ఇంత వరకు బాగానే ఉంది. కానీ నెల గడిచిన ఆ సిగ్నల్ ను ప్రారంభించకపోవడం విడ్డూరం. అన్నీ ఉన్నా అల్లుడి నోట్లో శని అన్న చందంగా మారింది.. అధికారుల పరిస్థితి. ఓ ప్రజాప్రతినిధి, ఉన్నతాధికారులు ప్రారంభించేందుకు సమయంలేదని, కొద్ది రోజులు ఆగాలని చెప్పడంతో.. ప్రారంభించడం పక్కన పెట్టినట్లు విశ్వసనీయ వర్గాల సమాచారం. సిగ్నళ్లను ప్రారంభించి ట్రాఫిక్ సమస్యతో పాటు ప్రమాదాలను అరికట్టాలని స్థానికులు, ప్రయాణికులు కోరుతున్నారు.