షూటింగ్ వరల్డ్ కప్‌లో ముగ్గురికి కరోనా
దిశ, స్పోర్ట్స్ : ఢిల్లీలో నిర్వహిస్తున్న షూటింగ్ ప్రపంచకప్‌లో ముగ్గురు ఆటగాళ్లకు కరోనా పాజిటివ్‌గా నిర్ధారణ అయ్యింది. ఇంటర్నేషనల్ షూటింగ్ స్పోర్ట్స్ ఫెడరేషన్ (ఐఎస్‌ఎస్ఎఫ్) ఆధ్వర్యంలో నిర్వహిస్తున్న ఈ ప్రపంచ టోర్నమెంట్‌లో ముగ్గురు కరోనా బారిన పడినట్లు నేషనల్ రైఫిల్ అసోసియేషన్ ఆఫ్ ఇండియా ప్రతినిధులు స్పష్టం చేశారు. కరోనా పాజిటివ్ వచ్చిన ముగ్గురిని కూడా తమ హోటల్ గదుల్లోనే ఐసోలేషన్ చేసినట్లు చెప్పారు. కాగా, కరోనా పాజిటివ్ వచ్చిన ఆటగాళ్లతో పాటు వారి గదుల్లో కలసి ఉన్న మరో ముగ్గురు క్రీడాకారులకు కూడా కరోనా పరీక్షలు నిర్వహించారు. అయితే వారి పరీక్ష ఫలితాలు రావాల్సి ఉన్నది. కాగా, కరోనా బారిన పడిన ముగ్గురు కూడా భారత క్రీడాకారులేనని సమాచారం. అయితే వారి పేర్లు వెల్లడించడానికి నిర్వాహకులు తిరస్కరించారు. ఇప్పటికే టోర్నీలో కరోనా బారిన పడిన నలుగురు చికిత్స పొందుతున్నారు.
