ఆడ బిడ్డను కన్నది.. వదిలించుకోవాలని చూసింది.. కానీ

దిశ, పటాన్‌చెరు: నవ మాసాలు మోసి బిడ్డను కన్న ఓ తల్లి వదిలించుకుని వెళ్లిపోదామని ప్రయత్నించింది. ఈ సంఘటన రామచంద్రాపురం పోలీస్ స్టేషన్ పరిధిలో చోటు చేసుకుంది. ఎస్ఐ కోటేశ్వర్​ రావు తెలిపిన వివరాల ప్రకారం… సంగారెడ్డి జిల్లా నారాయణఖేడ్​ కు చెందిన ఎం.బుల్లి కి మహారాష్ట్రకు చెందిన నగేష్ తో గత ఏడాది క్రితం విహాహం జరిగింది. అమీన్​పూర్​ పరిధిలోని బీరంగూడకు వలస వచ్చి జీవనం సాగిస్తుండగా, రెండు నెలల క్రితం మహారాష్ట్రలో జరిగిన రోడ్డు ప్రమాదంలో నగేష్ మృతి చెందాడు. నెలలు నిండిన గర్భవతి అయిన బుల్లి శనివారం లింగంపల్లిలో బస్​ కోసం నిలబడింది.

పురిటి నొప్పులు రావడంతో పక్కనే ఉన్న సులభ్​ కాంప్లెక్స్​లోకి వెళ్లిన ఆమె ఆడ శిశువుకు జన్మనిచ్చింది. అక్కడున్న కొంతమంది వెళ్లి చూసే సరికి బుల్లి అప్పుడే పుట్టిన శిశువును కిటికిలోంచి బయట పడేసేందుకు ప్రయత్నించింది. దీంతో పోలీసులకు సమాచారం అందించడంతో బుల్లి, శిశువును ఆసుపత్రికి తరలించే ప్రయత్నం చేశారు. తనకు ఆ బిడ్డ అవసరం లేదని, తనకొద్దంటూ తల్లి మారాం చేయడంతో పోలీసులు బుల్లి, శిశువును ఐసీడీఎస్ అధికారులకు అప్పగించారు. ఈ మేరకు పోలీసులు కేసును దర్యాప్తు చేస్తున్నారు.