మెట్రో రైలు కోసం మరో ఉద్యమం.. నడుంబిగించిన మాజీ ఎమ్మెల్యే
దిశ ప్రతినిధి, సంగారెడ్డి: అధికార టీఆర్ఎస్ పార్టీలో కొనసాగుతున్న సంగారెడ్డి మాజీ ఎమ్మెల్యే, పటాన్చెరుకు చెందిన సత్యనారాయణ(సత్తన్న) కేంద్ర, రాష్ట్ర ప్రభుత్వాలపై ఉద్యమించి మెట్రో రైల్లైన్ సాధించడానికి నడుంకట్టారు. రెండో ఫేజ్లో పటాన్చెరు వరకు మెట్రో పొడిగిస్తామని చెప్పిన ప్రభుత్వం ఆ మాటే మరచిపోయిందని విమర్శించారు. నిత్యం లక్షలాది మంది పటాన్చెరు ప్రాంతం నుంచి ప్రయాణాలు సాగిస్తున్నారని, ఈ క్రమంలో మెట్రో లైన్ పటాన్చెరు మీదుగా సంగారెడ్డి వరకు ఏర్పాటు చేయాలని ఆయన డిమాండ్ చేశారు.
భేల్, బీడీఎల్, ఓడిఎఫ్, గీతం యూనివర్సిటీ, ప్రతిష్టాత్మక ఐఐటీ, పారిశ్రామిక వాడలు ఉన్నాయని గుర్తు చేశారు. ఇందుకోసం ఆయన నేతృత్వంలో మెట్రో సాధన సమితిని ఏర్పాటు చేశారు. ఈ సందర్భంగా ఆదివారం ఆయన పటాన్చెరులో మీడియాతో మాట్లాడారు. మెట్రో లైన్ పొడిగింపు విషయంలో కేంద్రం 10 శాతం నిధులు ఇవ్వాలని, రాష్ట్ర ప్రభుత్వం మంజూరు ఇవ్వాలని చెప్పారు. రెండు ప్రభుత్వాలపై ఒత్తిడి పెంచి లైన్ సాధిస్తామని సత్యనారాయణ ధీమా వ్యక్తం చేశారు. సీఎం మొదలుకుని, ఎంపీ, ఎమ్మెల్యే అందరిని కలిసి స్థానిక ప్రజల ప్రయాణ ఇబ్బందులను వివరిస్తామని వివరించారు.
రాష్ట్రంలోని నాయకులకు, అధికారులకు ఏ మాత్రం అవగాహన లేకపోవడంతోనే మెట్రో లైన్ను మియాపూర్ వద్ద ముగించారని విమర్శించారు. అటవీ ప్రాంతంలా ఉండే అక్కడ కాకుండా చందానగర్ లేదా లింగంపల్లి వద్ద ముగించాల్సి ఉండేదన్నారు. 20 ఏండ్ల క్రితం మెట్రో పనులు మొదలయ్యాయి. రెండో విడతలో పటాన్చెరు వరకు లైన్ వస్తుందని హామీలు ఇచ్చారు. ఇప్పుడు వాటిని మరచిపోయారని విమర్శించారు. పాలక వర్గాలు, అవగాహన లేని నాయకులు ఉండడంతోనే ఈ పరిస్థితి నెలకొన్నదని పరోక్షంగా ఆయన ప్రభుత్వంపై ఆరోపణలు చేశారు.
ఒకరిని ఒకరు తిట్టుకోవడం, దుమ్మెత్తి పోసుకోవడం ఇప్పటి రాజకీయంలో ప్యాషన్ అయ్యిందని, టీవీల్లో తిట్ల దండకాలు చూసి జనం తిట్టుకుంటున్నారన్నారు. తిట్టుకుంటూ మజా చేసుకుంటున్నారు తప్ప, ప్రజా సమస్యలపై సీరియస్ నెస్ చూపించడం లేదని సత్యనారాయణ విమర్శించారు. ఎవరినీ వదిలిపెట్టబోమని, మెట్రో లైన్ సాధించే వరకు ఉద్యమాన్ని కొనసాగిస్తామని ఆయన స్పష్టం చేశారు. కాగా టీఆర్ఎస్ పార్టీలో ఉన్న సత్యనారాయణ మెట్రో సాధన ఉద్యమంపై సర్వత్రా చర్చ మొదలైంది.
ఆ పార్టీకి చెందిన ఎవరు కూడా సమావేశం వద్ద కనిపించలేదు. ఆయన కూడా పలు సందర్భాల్లో మీడియా ముందు ప్రభుత్వంపై కూడా సూటిగా విమర్శలు చేశారు. ఈ క్రమంలో 'సత్తన్న' ఉద్యమం చర్చానీయాంశంగా మారింది. ఈ సమావేశంలో వివిధ సంఘాలకు చెందిన నాయకులు, మేధావులు, పట్టణ ప్రముఖులు పాల్గొన్నారు.
