బీజేపీ అధికారంలోకి రాగానే బీసీ నేతను సీఎం చేస్తాం.. హిమంత బిశ్వ శర్మ

దిశ, సంగెం : సంగెం మండల కేంద్రంలో అస్సాం సీఎం హిమంత బిశ్వ శర్మ బీజేపీ పార్టీ అభ్యర్థి కాళీ ప్రసాద్ రావు తరపున రోడ్డు షో చేస్తూ ఎన్నికల ప్రచారం నిర్వహించారు. ఈ సందర్భంగా సీఎం మాట్లాడుతూ తెలంగాణలో పెట్రోల్ ధర 110 రూపాయలు ఉంటే, అస్సాంలో, బీజేపీ ప్రభుత్వ రాష్ట్రాలలో 97 రూపాయలు ఉందని అన్నారు. కేసీఆర్ సర్కార్ పెట్రోల్, డీజిల్ ధర పెంచి తన జేబులను నింపుకుంటున్నాడని అన్నారు. తెలంగాణలో బీజేపీ ప్రభుత్వం అధికారంలోకి వస్తే 90 రూపాయలకే పెట్రోల్ ధరకు ఇస్తామని తెలిపారు. అధికారంలోకి వస్తే రెండు లక్షల ఉద్యోగాలను భర్తీ చేస్తామని అన్నారు. సంవత్సరానికి నాలుగు గ్యాస్ సిలిండర్లు ఉచితంగా పంపిణీ చేస్తామని అన్నారు.

రైతులు పండించిన ధాన్యానికి గరిష్టంగా మద్దతు ధర ఇస్తామని అన్నారు. రాహుల్ గాంధీకి 54 సంవత్సరాలైనా ఇంకా యువనేతనా, రాహుల్ గాంధీ తెలంగాణకి ఆరు గ్యారెంటీలని చెప్పి మోసం చేస్తున్నాడని తెలంగాణ ప్రజలు నమ్మవద్దని, కర్ణాటకలో గ్యారెంటీలతో గద్దెనెక్కిన కాంగ్రెస్ పార్టీ ఆ రాష్ట్రంలో ఏ గ్యారెంటీ అమలు చేయడం లేదని అన్నారు. బీజేపీ తెలంగాణలో ప్రభుత్వం రాగానే బీసీనే సీఎం చేస్తామని, డాక్టర్ కాళీ ప్రసాద్ రావును అత్యధిక మెజార్టీతో గెలిపించాలని కోరారు. ఈ కార్యక్రమంలో బీజేపీ మండల పార్టీ అధ్యక్షుడు బుట్టి కుమారస్వామి, బీజేపీ నాయకులు రహమతుల్లా, యాదగిరిరావు, రంగరాజు, కృష్ణ, మొలుగురి శ్రీనివాస్, శేషాద్రి, జక్క చేరాలు కార్యకర్తలు పాల్గొన్నారు.