వరంగల్‌లో భారీ అగ్నిప్రమాదం... (వీడియో)

దిశ, కరీమాబాద్: వరంగల్ ఇసుక అడ్డ వద్ద శుక్రవారం అర్ధరాత్రి సుమారు 2 గంటల సమయంలో ఘోర అగ్నిప్రమాదం చోటుచేసుకుంది. వరంగల్ ఇసుక అడ్డ వద్ద పాత దర్వాజాలు, తలుపులు, పాత ఇనుప సామాను, ఫర్టిలైజర్ దుకాణాలలో మంటలు చెలరేగి 8 పాత దర్వాజాల దుకాణాలు ఒక పాత ఇనుప సామాను దుకాణం, ఒక ఫర్టిలైజర్ గోదాం పూర్తిగా మంటల్లో కాలిపోయాయి. స్థానికులు తెలిపిన వివరాల ప్రకారం సుమారు రెండు గంటల సమయంలో అటువైపుగా వెళుతున్న స్థానికులకు పెద్ద మొత్తంలో పొగతో కూడిన మంటలు కనబడడంతో 101 ఫైర్ ఇంజన్ కి సమాచారం అందించారు. ఫైర్ ఇంజన్ సిబ్బంది వచ్చే సమయంలో షాప్ లో మంటలు ఎగసిపడుతూ ఫర్నిచర్ మొత్తం కాలిపోయింది. అగ్నిమాపక సిబ్బంది మంటలు ఆర్పేందుకు ప్రయత్నిస్తున్నారు. సంఘటనా స్థలానికి హుటాహుటిన చేరుకున్న వరంగల్ ఏసీపీ గిరికుమార్ కల్కొట, మట్టేవాడ ఇన్స్పెక్టర్ రమేష్, మిల్స్ కాలనీ ఇన్స్పెక్టర్ శ్రీనివాస్ చేరుకొని సంఘటన స్థలాన్ని పరిశీలిస్తున్నారు. మంటలు ఇంకా అదుపులోకి రాలేదు. ఈ అగ్ని ప్రమాదానికి సంబంధించిన పూర్తి వివరాలు తెలియాల్సి ఉంది.