కాంగ్రెస్ లో నయా "జోష్"..
దిశ, భిక్కనూరు : హై కమాండ్ పెట్టుకున్న ఆశలకు అనుగుణంగా.. కర్ణాటక ప్రజలు కాంగ్రెస్ పార్టీకి అధికారం కట్టబెట్టడంతో ఆ పార్టీ నేతల్లో నయాజోష్ నెలకొంది. ఊహించిన దాని కంటే ఎక్కువ సంఖ్యలో సీట్లు గెలుపొందడంతో, అదే విధమైన ఫలితాలు జరగబోయే తెలంగాణ ఎన్నికల్లో రిపీట్ అవుతాయన్న నమ్మకంతో కాంగ్రెస్ నాయకులు వాట్సాప్ గ్రూపుల్లోనే కాకుండా, కాంగ్రెస్ ఫలితాలను స్టేటస్ గా పెట్టుకొని తెగ సంబర పడిపోతున్నారు. ఒక్కొక్కరు ఒక్కో రకంగా స్టేటస్ లు, పోస్టులు పెడుతూ సంబరాల్లో మునిగిపోయారు.
కర్ణాటక నుంచే మార్పు మొదలైందని ఒకరు, రాష్ట్రంలో, కేంద్రంలోఅధికారం చేపడుతుందని మరికొందరు వాట్సాప్ గ్రూపుల్లో పోస్ట్ చేశారు. సీఎం కేసీఆర్, ప్రధానమంత్రి నరేంద్ర మోడీ పాలనతో పదిసంవత్సరాలుగా విసిగి వేసారిన ప్రజలు, వారి ప్రభుత్వాలను సాగనంపేందుకు సిద్ధంగా ఉన్నారని ప్రకటిస్తున్నారు. మధ్య, పేద తరగతి బతుకుల్లో మార్పు రావాలంటే అది కాంగ్రెస్ పార్టీతోనే సాధ్యమని అందుకే తెలంగాణ రాష్ట్రాన్నిచ్చిన సోనియమ్మకు, రాష్ట్ర ప్రజలు అధికారం కట్టబెట్టి తెలంగాణ ప్రజలు రుణం తీర్చుకోవడానికి మంచి అవకాశాన్నిచ్చినట్లు అవుతుందని పోస్ట్ ల్లో ఉన్న సారాంశం.
