వడ్డెరల అభివృద్ధికి కృషి... : ఎమ్మెల్యే

దిశ, కోదాడ టౌన్: బీఆర్ఎస్ హయాంలోనే నియోజకవర్గంలోని వడ్డెరల అభివృద్ధి సాధ్యమైందని ఎమ్మెల్యే, బీఆర్ఎస్ అభ్యర్థి బొల్లం మల్లయ్య యాదవ్ అన్నారు. కోదాడలో మంగళవారం జరిగిన వడ్డెరల ఆత్మీయ సమ్మేళనంలో ఆయన మాట్లాడారు. దశాబ్దాలుగా కోదాడను ఏలిన ఏ ఎమ్మెల్యే వడ్డెరల కనీస సమస్యలను తీర్చలేకపోయారని అన్నారు. వారికి శ్మశాన వాటికకు కూడా దిక్కు లేకుండా పోయిందని, అలాంటి దుస్థితిలో వడ్డెరలకు కోదాడ చెరువు ప్రాంతంలో దాదాపు రెండెకరాల స్థలం ఇప్పించిన ఘనత బీఆర్ఎస్ ప్రభుత్వానిదే అన్నారు. భవిష్యత్తులో కూడా వారికి అండగా ఉంటానని భరోసా ఇచ్చారు.

ఈ సందర్భంగా వడ్డెర కులానికి చెందిన టీడీపీ నాయకులు చింతల కొండలు, చల్లా వెంకటనారాయణ ఆధ్వర్యంలో 200 మంది బీఆర్ఎస్‌లో చేరారు. వారికి ఎమ్మెల్యే పార్టీ కండువా కప్పి పార్టీలోకి ఆహ్వానించారు. ఈ కార్యక్రమంలో బత్తుల ఉపేందర్, పట్టణ పార్టీ అధ్యక్షుడు చందు నాగేశ్వరరావు, మైనార్టీ విభాగం నాయకుడు నయీం, కౌన్సిలర్లు ఒంటిపులి రామ్ శ్రీనివాస్, చింతల నాగేశ్వరరావు, వడ్డెర సంఘం నాయకులు చింతల లింగయ్య, పల్లపు పుల్లయ్య, అలకుంట్ల నరసింహ, రాపాణి శ్రీను, వేముల వెంకన్న, తురక పిచ్చయ్య తదితరులు పాల్గొన్నారు.