మూత్ర విసర్జనకు వెళ్లి..శవమై వచ్చాడు

దిశ, చౌటుప్పల్ టౌన్: అర్ధరాత్రి గుర్తు తెలియని వాహనం ఢీ కొని తూర్పుగోదావరి జిల్లా రాజమండ్రి పట్టణంలోని మల్లికార్జున నగర్ కు చెందిన దొంతభక్తుని రాజారావు (62) అనే వ్యక్తి దుర్మరణం చెందాడు. ఈ సంఘటన యాదాద్రి భువనగిరి జిల్లా చౌటుప్పల్ మండలం లక్కారం శివారులోని తాజా టిఫిన్ సెంటర్ వద్ద చోటుచేసుకుంది. చౌటుప్పల్ పోలీస్ ఇన్స్పెక్టర్ మన్మధ రావు కథనం ప్రకారం..మృతుడి రాజారావు తన స్వగ్రామం నుంచి హైదరాబాదులో తన కూతురు ఇంటికి శుక్రవారం ఉదయం వెళ్లాడు. అదే రోజు రాత్రి 8 గంటలకు భార్యతో కలిసి రాజమండ్రికి ఆర్టీసీ బస్సులో తిరుగు ప్రయాణమయ్యాడు. సదరు బస్సు మార్గమధ్యలో చౌటుప్పల్ మండలంలోని లక్కారం గ్రామ శివారులో తాజా టిఫిన్ సెంటర్ దగ్గర ఆల్ఫాహారం కోసం రాత్రి 11:15 గంటలకి ఆపాడు. మృతుడు రాజారావు రోడ్డు పక్కన మూత్ర విసర్జన చేసి తిరిగి వస్తున్న క్రమంలో హైదరాబాద్ నుంచి విజయవాడ వైపు వెళుతున్న గుర్తు తెలియని వాహనం ఢీ కొట్టి వెళ్లి పోయింది. ఈ ప్రమాదంలో రాజారావు తలకు బలమైన గాయాలు తగిలి అక్కడికక్కడే మృతి చెందాడు. మృతదేహాన్ని పోలీసులు స్థానిక ప్రభుత్వ ఆసుపత్రి మార్చురికి తరలించారు. మృతుడి భార్య ఫిర్యాదు మేరకు కేసు నమోదు చేసుకొని దర్యాప్తు చేస్తున్నట్టు ఇన్స్పెక్టర్ మన్మధరావు తెలిపారు.