Kavitha: ఆ హామీ అమలు ఇంకెప్పుడు? సీఎం రేవంత్ రెడ్డికి ఎమ్మెల్సీ కవిత బహిరంగ లేఖ
దిశ, డైనమిక్ బ్యూరో: స్థానిక సంస్థల్లో బీసీ రిజర్వేషన్ల పెంపు ఇంకెంతకాలం జాప్యం చేస్తారని బీఆర్ఎస్ ఎమ్మెల్సీ కల్వకుంట్ల కవిత (MLC Kavita) ముఖ్యమంత్రి రేవంత్ రెడ్డి (CM Revanth Reddy)ని ప్రశ్నించారు. అధికారంలోకి వచ్చిన 6 నెలల్లోపే బీసీలకు రిజర్వేషన్లు పెంచుతామని కామారెడ్డి బీసీ డిక్లరేషన్ లో (Kamareddy Declaration) స్పష్టంగా పేర్కొని ఇప్పుడు ఏడాది గడిచినా రిజర్వేషన్ల పెంపునకు అతీగతీ లేదని మండిపడ్డారు. ఈ మేరకు గురువారం సీఎం రేవంత్ రెడ్డికి బహిరంగ లేఖ రాసిన కవిత.. అశాస్త్రీయంగా బీసీ గణన నిర్వహించి, డెడికేటెడ్ కమిషన్ పేరిట కాలయాప చేయడమే మీ ఆలోచనగా కనిపిస్తోందని ధ్వజమెత్తారు. కులగణన పూర్తయి కూడా చాలా కాలం అవుతున్నా ఇప్పటి వరకు ప్రభుత్వం ఆ వివరాలు బహిర్గతం చేయలేదని మరో వైపు డెడికేటెడ్ కమిషన్ నివేదిక సిద్ధమైనట్లు వార్తలు వస్తున్నా తదిపరి కార్యాచరణపై ప్రభుత్వం స్పష్టత ఇవ్వడం లేదన్నారు. బీసీల అంశాల పట్ల మీ ప్రభుత్వం ఎందుకు నిర్లక్ష్యం వహిస్తోంది? బీసీలంటే కాంగ్రెస్ పార్టీకి ఎందుకు చులకన అని ప్రశ్నించారు. బీసీల రిజర్వేషన్లు 42 శాతానికి పెంపును విస్మరిస్తే ఊరుకోయేది లేదని కుంటిసాకులతో ఇచ్చిన హామీ కంటే తక్కువ రిజర్వేషన్లు కల్పిస్తే తెలంగాణ సమాజం మిమ్మల్ని క్షమించదన్నారు.
మెడలు వంచి అమలు చేయించుకుంటాం:
బీసీలకు ఏటా రూ.20 వేల కొట్ల చొప్పున ఐదేళ్లలో రూ. లక్ష కోట్ల బడ్జెట్ కేటాయిస్తామని హామీ ఇచ్చి 2024-25 బడ్జెట్ లో అరకొర కేటాయింపులు చేసి తొలి ఏడాదే కామారెడ్డి డిక్లరేషన్ ను ముఖ్యమంత్రి ఉల్లంఘించారని కవిత విమర్శఇంచారు. రాష్ట్రంలో గ్రామ పంచాయతీల పదవీకాలం ముగిసి దాదాపు ఏడాది పూర్తవుతున్నా స్థానిక సంస్థలకు ఎన్నికలు నిర్వహిం చకుండా గ్రామాల్లో ప్రజాపాలనకు బదులు ప్రత్యేకాధికారుల పాలన సాగుతోందన్నారు. మీ ప్రభుత్వానికి త్వరలో రిజర్వేషన్లను పెంచి ఎన్నికలు నిర్వహించాలన్న సోయిలేనట్లుగా అర్థమవుతున్నదని అనుమానం వ్యక్తం చేశారు. తక్షణమే స్థనిక సంస్థల్లో బీసీలకు రిజర్వేషన్లు (BC Reservations) పెంచి ఎన్నికలు నిర్వహించాలని డిమాండ్ చేశారు. బీసీలకు అన్యాయం చేయాలని చూస్తే బీఆర్ఎస్ పార్టీ మీ మెడలు వంచి హామీని అమలు చేయించుకుంటామని హెచ్చరించారు.
