బాలికను కిడ్నాప్ చేసిన వ్యక్తి రిమాండ్‌...
దిశ, జవహర్ నగర్: బాలికకు మాయమాటలు చెప్పి కిడ్నాప్ చేసిన ఓ వ్యక్తిని శుక్రవారం జవహర్ నగర్ పోలీసులు రిమాండ్‌కు తరలించారు.
కార్పొరేషన్ పరిధిలోని వైఎస్ఆర్ నగర్ కి చెందిన ఓ బాలిక (14) ఎనిమిదో తరగతి చదువుతుంది. ఈ నెల 18న ఉదయం పాఠశాలకు వెళ్లి తిరిగి సాయంత్రం ఇంటికి రాకపోవడంతో బాలిక తల్లిదండ్రులు పోలీసులకు ఫిర్యాదు చేశారు. అదే కాలనీలో నివాసముంటున్న జాజుల సుధాకర్ అనే వ్యక్తిపై అనుమానం వ్యక్తం చేయడంతో అతనిపై కిడ్నాప్ కేసు నమోదు చేసుకొని దర్యాప్తు చేపట్టినట్లు సీఐ తెలిపారు.
సుధాకర్ బాలికకు మాయమాటలు చెప్పి ఇటీవల కిడ్నాప్ చేసి విజయవాడ, శ్రీశైలం తీసుకెళ్లినట్లు పోలీసుల దర్యాప్తులో తేలింది. విశ్వసనీయ సమాచారం మేరకు గురువారం సాయంత్రం జవహర్ నగర్ కార్పొరేషన్ పరిధిలోని చెన్నాపురం చౌరస్తాలో సుధాకర్ ను పోలీసులు అదుపులోకి తీసుకున్నారు. సుధాకర్ కి ముగ్గురు పిల్లలు, భార్యతో కలిసి కారు డ్రైవర్ గా విధులు నిర్వహిస్తూ మూడేళ్ల క్రితం బోడుప్పల్ నుంచి వైఎస్ఆర్ నగర్ లో నివాసం ఉంటున్నారు. సుధాకర్ ను శుక్రవారం సాయంత్రం రిమాండ్‌కు తరలించినట్లు పోలీసులు తెలిపారు.
