విద్యార్థుల ఆరోగ్యంపై శ్రద్ధ వహించాలి

దిశ, కీసర : విద్యార్థులు ఆరోగ్యంగా ఉన్నప్పుడే చదువుపై ఆసక్తి పెరుగుతుందని, విద్యార్థుల ఆరోగ్యంపై ప్రత్యేక శ్రద్ద వహించాలని మేడ్చల్ మల్కాజ్గిరి జిల్లా అదనపు కలెక్టర్ విజయేందర్ రెడ్డి అన్నారు. కీసర మండల పరిధిలోని బీసీ, ఎస్సీ, ఎస్టీ రెసిడెన్షియల్ వెల్ఫేర్ హాస్టల్ లను తహసిల్దార్ అశోక్ కుమార్ తో కలిసి శనివారం తనిఖీ చేశారు.

ఈ సందర్భంగా విద్యార్థులకు అందిస్తున్న భోజనం, హాస్టల్లోని వంటశాల, స్టోర్ రూమ్, భోజనశాలలను పరిశీలించారు. విద్యార్థులతో మాట్లాడి సమస్యలు అడిగి తెలుసుకున్నారు. అనంతరం ఆయన మాట్లాడుతూ.. విద్యార్థులకు నాణ్యమైన భోజనం, మౌలిక వసతులతో పాటు వారి ఆరోగ్యం పట్ల ప్రత్యేక శ్రద్ధ చూపాలని సంబంధిత అధికారులను ఆదేశించారు. ఈ కార్యక్రమంలో జిల్లా ఎస్సీ అభివృద్ధి శాఖ అధికారి వినోద్ కుమార్ సంబంధిత అధికారులు పాల్గొన్నారు.