మార్పు కోసం ఎటువంటి ప్రలోభాలకు లొంగొద్దు : జి.కిషన్రెడ్డి
దిశ, చార్మినార్ : 17 రోజులుగా దేశవ్యాప్తంగా ఎంతో ఉత్కంఠగా ఎదురుచూస్తున్న ఉత్తర ఖాండ్లోని సొరంగంలో చిక్కుకున్న కార్మికులు అమ్మవారి ఆశీస్సులతో సురక్షితంగా బయటపడడం ఎంతో గొప్ప విషయమని బీజేపీ తెలంగాణ రాష్ట్ర అధ్యక్షుడు జి.కిషన్ రెడ్డి అన్నారు. ప్రధాని నరేంద్ర మోడీ నాయకత్వంలో కేంద్ర, రాష్ట్ర ప్రభుత్వాలు 17 రోజుల పాటు చర్చలు జరిపి, శ్రమించి కార్మికులను సురక్షితంగా బయటికి తీసుకురావడం చాలా సంతోషకరమైన విషయమన్నారు. బుధవారం చారిత్రాత్మక చార్మినార్ శ్రీ భాగ్యలక్ష్మి దేవాలయాన్ని బీజేపీ రాష్ట్ర అధ్యక్షుడు జి.కిషన్ రెడ్డి సందర్శించారు. ఈ సందర్భంగా ఆయన అమ్మవారికి ప్రత్యేక పూజలు నిర్వహించారు. ఈ సందర్భంగా కిషన్ రెడ్డి మాట్లాడుతూ నాలుగు రాష్ట్రాల్లో ఇప్పటికే ఎన్నికలు పూర్తయ్యాయని, చివరగా తెలంగాణ రాష్ట్రంలో గురువారం ఎన్నికలు జరుగనున్నాయన్నారు.
ఎన్నికలు ప్రశాంతంగా జరగాలంటే ప్రతి ఒక్కరూ తమ ఓటు హక్కును వినియోగించుకోవాలన్నారు. సమగ్రమైన మార్పుకు అందరూ కూడా ఆలోచించాలని, ఎవరు కూడా ఏ రకమైన ప్రలోభాలకు, డబ్బులకు, మద్యానికి లొంగొద్దని సూచించారు. రాజ్యాంగం మనకిచ్చిన హక్కును ప్రతి ఒక్కరూ సద్వినియోగం చేసుకోవాలని, సానుకూలంగా ఉపయోగించుకోవాలన్నారు. దేశ, రాష్ట్ర భవిష్యత్తును దృష్టిలో పెట్టుకుని అందరూ కూడా విధిగా పోలింగ్ బూత్లకు వెళ్లి రేపు ఉదయం అన్ని వర్గాల ప్రజలు తమ ఓటు హక్కును వినియోగించుకోవాలన్నారు. తప్పకుండా దేశ, రాష్ట్ర ప్రజల మీద శ్రీ భాగ్యలక్ష్మి అమ్మవారి ఆశీస్సులు ఉండాలని ప్రార్ధించినట్లు కిషన్ రెడ్డి పేర్కొన్నారు. దేశం, రాష్ట్రం వేగవంతంగా ముందుకు వెళ్లాలంటే ముఖ్యంగా తెలంగాణ రాష్ట్రం అవినీతి రహిత రాష్ట్రంగా ఒక ప్రజాస్వామ్య రాష్ట్రంగా వెల్లివిరియాలని కిషన్ రెడ్డి అమ్మవారిని వేడుకున్నట్లు పేర్కొన్నారు.
