సకాలంలో పోలీస్ సేవలకు... దేశ వ్యాప్తంగా గుర్తింపు...

దిశ, సిటీ క్రైమ్ : హైదరాబాద్ పోలీసు కమిషనరేట్ పరిధిలోని శాలిబండ పోలీసు స్టేషన్ కు జాతీయ స్థాయిలో ప్రత్యేక గౌరవం దక్కింది. పౌరులకు పోలీసు సేవలను సకాలంలో అందిస్తున్నందుకు జాతీయ స్థాయిలో 8 వ ర్యాంక్ సంపాదించిందని డీజీపీ జితేందర్ శుక్రవారం ఎక్స్ వేదికగా తెలిపారు. ఒడిశా భువనేశ్వర్ లో డీజీపీ, ఐజిపి సమావేశంలో కేంద్ర హోమ్ శాఖ ఈ ర్యాంక్ ను ప్రకటించిందని డీజీపీ తెలిపారు. ఈ ర్యాంక్ తో రాష్ట్ర, హైదరాబాద్ సిటీ పోలీసింగ్ కు దేశవ్యాప్తంగా ప్రతిష్ట పెరిగిందన్నారు. ప్రజలకు అనుగుణంగా పోలీసులు వృత్తి నైపుణ్యం, నిబద్ధతో సేవలను అందిస్తుండటం తో రాష్ట్ర పోలీస్ శాఖ పనితీరు దేశానికి ఆదర్శం గా మారిందన్నారు. ఈ ఘనత సాధించిన శాలిబండ పోలీస్ స్టేషన్ సిబ్బంది, సిటీ పోలీస్ కమిషనర్, పోలీసు ఉన్నతాధికారులకు శుభాకాంక్షలు తెలిపి వారిని డీజీపీ అభినందించారు.