Harish Rao: ఇంకెన్నాళ్లు అలా తప్పించుకుంటావు రేవంత్? సీఎంకు హరీశ్‌రావు కౌంటర్
దిశ, డైనమిక్ బ్యూరో: “ఇండియా టుడే” నిర్వహించిన కాంక్లేవ్ కార్యక్రమంలో గత బీఆర్ఎస్ పాలనలో తెలంగాణ అప్పులపై సీఎం రేవంత్ రెడ్డి (CM Revanth Reddy) మాట్లాడారు. రూ. 7 లక్షల కోట్లు అప్పు అయిందని వెల్లడించారు. ఈ నేపథ్యంలోనే మాజీ మంత్రి హరీశ్‌రావు (Harish Rao) సీఎం రేవంత్ రెడ్డికి ఎక్స్ ఖాతా వేదికగా కౌంటర్ ఇచ్చారు. అధికారంలోకి వచ్చి ఏడాదిన్నర అవుతున్నా ఇంకెన్నాళ్లు అప్పుల పేరు చెప్పి తప్పించుకు తిరుగుతారని రేవంత్ రెడ్డిని ప్రశ్నించారు. ఒక అబద్ధాన్ని వంద సార్లు చెప్పినంత మాత్రాన అది నిజం అయిపోదన్నారు. తెలంగాణ అప్పు (Telangana debts) ఏడు లక్షల కోట్లు అని మీరు చేస్తున్న ప్రచారం శుద్ధ తప్పు అని అనేక సార్లు చెప్పానని అన్నారు.
రాష్ట్ర అప్పు రూ. 4.17 లక్షల కోట్లు మాత్రమేనని (TG Assembly) అసెంబ్లీ వేదికగా ఆధారాలతో సభ్యులకు, రాష్ట్ర ప్రజలకు వివరించానని గుర్తుకు చేశారు. అయినా మీరు ముఖ్యమంత్రి హోదాలో ఉండి మళ్ళీ అదే అబద్ధాన్ని చెబుతూ బీఆర్ఎస్ పాలన పై దుష్ప్రచారం చేస్తున్నారని ఆరోపించారు. దివ్యంగా ఉన్న రాష్ట్రం, దివాలా తీసిందని పరపతి, ప్రతిష్ట దిగజార్చుతున్నారని మండిపడ్డారు. అప్పుల పై రేవంత్ రెడ్డి అబద్ధాలను, అవాస్తవాలను తీవ్రంగా ఖండిస్తున్నట్లు ప్రకటించారు.
