పెంచికలపేటలో పులి సంచారం

దిశ, బెజ్జూర్ : పెంచికలపేట రేంజ్ లో శుక్రవారం పులి సంచరించింది. బెజ్జూరు గ్రామానికి చెందిన రామగిరి శ్రీనివాస్ కాగజ్నగర్ నుండి బెజ్జూర్ వైపు పెంచికలపేట మీదుగా వస్తుండగా లోడుపల్లి అటవీ ప్రాంతంలో పులి కనిపించడంతో భయాందోళనకు గురయ్యారు. పులి భయంతోనే అక్కడి నుండి ద్విచక్ర వాహనంతో పారిపోయినట్లు రామగిరి శ్రీనివాస్ తెలిపారు. లోడు పెళ్లి అటవీ ప్రాంతంలోని సిద్దేశ్వర గుట్టల వైపు పులివెళ్లినట్లు ఆయన తెలిపారు. కాగజ్నగర్ డివిజన్​ గన్నారం అటవీ ప్రాంతంలో మొర్లే లక్ష్మీ అనే మహిళపై దాడి చేయడంతో అక్కడికక్కడే మృతి చెందింది. లోడ్పల్లి అటవీ ప్రాంతంలో పులి సంచరించడంతో రోడ్డుపై వెళ్లేందుకు ప్రయాణికులు జంకుతున్నారు.