TG Govt: 90 శాతం సర్వే పూర్తి.. కలెక్టర్లకు సీఎస్ కీలక ఆదేశాలు

దిశ, తెలంగాణ బ్యూరో: సామాజిక, ఆర్థిక, విద్య, ఉపాధి, రాజకీయ కుల గణన సర్వే(సమగ్ర ఇంటింటి కుటుంబ సర్వే) వివరాల కంప్యూటరీకరణ ప్రక్రియను చేపట్టాలని రాష్ట్ర ప్రభుత్వ ప్రధాన కార్యదర్శి సీఎస్ శాంతికుమారి జిల్లా కలెక్టర్లకు ఆదేశాలు జారీ చేశారు. పలు జిల్లాల్లో సర్వే పూర్తి కాగానే, మరి కొన్ని జిల్లాల్లో 90 శాతానికి పైగా సర్వే కొనసాగుతుండగానే, ఇదే సమయంలో డేటాను కంప్యూటరీకరణ చేయాలని సూచించారు. ఈ సర్వే డాటా నమోదులో డేటా ఎంట్రీ ఆపరేటర్, ఎన్యుమరేటర్ కలిసి సర్వే వివరాలను ఎలాంటి పొరపాట్లు లేకుండా జాగ్రత్తగా నమోదు చేయాలని సీఎస్ ఆదేశించారు. ఈ సమగ్ర ఇంటింటి సర్వేలో మొత్తం 1,16,93,698 నివాసాలు గుర్తించగా, శనివారం వరకు 1,05,03,257 నివాసాలలో సర్వే పూర్తి చేసింది. 89.8 శాతం సాధించిందని, 2,61,384 నివాసాలకు సంబంధించిన సర్వే వివరాలు కంప్యూటరీకరణ చేసినట్టు పేర్కొన్నారు. జీహెచ్ఎంసీ పరిధిలో 25,05,517 నివాసాలు సర్వే చేయాల్సి ఉండగా నేటి వరకు 17,47,056 నివాసాలు సర్వే పూర్తిచేసి 70 శాతానికి చేరుకుందని తెలిపారు.

నిర్లక్ష్యంగా వ్యవహరించిన సూపర్ వైజర్ సస్పెండ్

సమగ్ర ఇంటింటి కుటుంబ సర్వే ఫారాలు తార్నాక రోడ్లపై దర్శనమిచ్చాయంటూ నిన్న సోషల్ మీడియాలో వచ్చిన కథనాలపై విచారణ జరిపి బాధ్యులపై చర్యలు తీసుకున్నట్టు మేడ్చల్ మల్కాజిగిరి కలెక్టరు గౌతం పొత్రు బీసీ కమిషన్ చైర్మన్‌కు సమర్పించిన నివేదికలో పేర్కొన్నారు. విషయం తన దృష్టికి వచ్చిన వెంటనే బీసీ కమిషన్ చైర్మన్ సంబంధిత కలెక్టరును వివరణ కోరగా, మేడ్చల్ కలెక్టర్ జరిగిన సంఘటనను వివరించారు. జవహర్ నగర్ మున్సిపల్ కార్పొరేషన్ పరిధిలోని వార్డు నంబర్ 27కు సంబంధించిన సర్వే ఫారాలను సూపర్ వైజర్ తన వాహనంలో తీసుకుని వెళ్తుండగా కిందపడిపోయినట్టు గుర్తించారు. వీటిని గమనించిన జలమండలి సిబ్బంది వెంటనే సంబంధిత అధికారులకు సమాచారమివ్వగా ఆ ఫారములను స్వాధీనం చేసుకున్నారని తెలిపారు. ఈ సంఘటనలో నిర్లక్ష్యంగా వ్యవహరించిన సూపర్ వైజర్‌ను సస్పెండ్ చేస్తూ చర్యలు తీసుకున్నట్టు కలెక్టరు తన నివేదికలో పేర్కొన్నారు.