PV Sindhu : ఘనంగా పీవీ సింధు ఎంగేజ్‌మెంట్‌
దిశ, వెబ్ డెస్క్ : స్టార్‌ బ్యాడ్మింటన్‌ క్రీడాకారిణి పీవీ సింధు(PV Sindhu) ఎంగేజ్‌మెంట్‌ ఘనంగా జరిగింది. హైదరాబాద్‌కు చెందిన ఐటీ ప్రొఫెషనల్‌ వెంకట దత్తసాయి(Venkata Dattha Sai)తో త్వరలోనే వివాహం జరుగనున్న క్రమంలో ఇరువైపులా కుటుంబ సభ్యులు నేడు ఎంగేజ్‌మెంట్‌ నిర్వహించారు. ఈ సందర్భంగా పీవీ సింధు, వెంకట దత్తసాయి రింగ్స్‌ మార్చుకున్నారు. ఎంగేజ్‌మెంట్‌ ఫొటోను సింధు ఇన్‌స్టాగ్రామ్‌(Instagram) వేదికగా అభిమానులతో పంచుకున్నది. "ఒకరి ప్రేమ దక్కిన సమయంలో.. తిరిగి మనం ప్రేమించాలి" అని క్యాప్షన్‌తో ఫొటోను షేర్‌ చేసింది. ఎంగేజ్‌మెంట్‌ సందర్భంగా ఇద్దరూ కేక్‌ కట్‌ చేశారు. సింధు వివాహ వేడుక ఈ నెల 22న రాజస్థాన్‌(Rajasthan)లో ఉదయ్‌పూర్‌(Udaypur)లోని ప్యాలెస్‌లో ఘనంగా నిర్వహించేందుకు ఏర్పాట్లు చేశారు. కాబోయే వరుడు వెంకట దత్త సాయి... పొసిడెక్స్‌ టెక్నాలజీస్‌లో ఎగ్జిక్యూటివ్‌ డైరెక్టర్‌గా కొనసాగుతున్నారు. రెండు కుటుంబాలకు ఎప్పటి నుంచో పరిచయం ఉండగా.. నెల రోజుల కిందట పెళ్లి ఫిక్స్‌ చేశారు. అయితే, జనవరి నుంచి సింధు వరుస టోర్నీలు ఆడనున్నది. అందుకే సాధ్యమైనంత తొందరగా పెళ్లి చేయాలని భావించినట్లు పీవీ సింధు తండ్రి తెలిపారు. డిసెంబర్‌ 22న పెళ్లికి ముహూర్తం నిర్ణయించామని.. 24న హైదరాబాద్‌లో రిసెప్షన్‌ ఉంటుందని తెలిపారు. ఈ వేడుకలకు దేశంలోని పలువురు క్రీడా, సినీ, రాజకీయ ప్రముఖులు హాజరవనున్నారు.
