రెండో వన్డేలో శ్రీలంక గెలుపు.. బంగ్లాతో వన్డే సిరీస్ 1-1తో సమం

దిశ, స్పోర్ట్స్ : బంగ్లాదేశ్‌తో మూడు వన్డేల సిరీస్‌లో శ్రీలంక జట్టు పుంజుకుంది. తొలి మ్యాచ్‌లో ఓడిన శ్రీలంక రెండో వన్డేలో నెగ్గి సిరీస్‌ను 1-1తో సమం చేసింది. శుక్రవారం చటో‌గ్రామ్ వేదికగా జరిగిన రెండో వన్డేలో బంగ్లాపై 3 వికెట్ల తేడాతో శ్రీలంక విజయం సాధించింది. టాస్ ఓడి ముందుగా బ్యాటింగ్ చేసిన బంగ్లా జట్టు నిర్ణీత ఓవర్లలో 7 వికెట్లు కోల్పోయి 286 పరుగుల చేసింది. తౌహిద్ హృదయ్(96) తృటిలో సెంచరీ చేజార్చుకోగా.. సౌమ్య సర్కార్(68) రాణించాడు. లంక బౌలర్లలో వానిందు హసరంగ(4/45) సత్తాచాటాడు. 287 పరుగుల లక్ష్యాన్ని శ్రీలంక జట్టు 47.1 ఓవర్లలో 7 వికెట్లు కోల్పోయి ఛేదించింది. ఓపెనర్ పాథుమ్ నిస్సాంక(114) సెంచరీతో కదం తొక్కగా అతనికితోడు చరిత్ అసలంక(91) రాణించాడు. ఆఖర్లో హసరంగ(25) మెరిపించగా.. దునిత్ వెల్లలాగే(15 నాటౌట్) జట్టును విజయతీరాలకు చేర్చాడు. సోమవారం నిర్ణయాత్మక మూడో వన్డే జరగనుంది.