వద్దు ఆగు… నేను చూసుకుంటా: రేవంత్ రెడ్డి
దిశ, తెలంగాణ బ్యూరో : కాంగ్రెస్పార్టీ అసమ్మతి నేతలను బుజ్జగించేందుకు ఎంపీ రేవంత్రెడ్డి రంగంలోకి దిగారు. ఇప్పటికే కూన శ్రీశైలం గౌడ్‌తో సంప్రదింపులు చేయగా… రాజీనామా చేసిన హర్షవర్ధన్రెడ్డితో తాజాగా సోమవారం సాయంత్రం భేటీ అయ్యారు. హర్షవర్ధన్‌ను పిలిపించుకుని సమావేశమయ్యారు. హైదరాబాద్–రంగారెడ్డి–మహబూబ్నగర్ పట్టభద్రుల ఎమ్మెల్సీ టికెట్విషయంలో హర్షవర్ధన్ అలక బూనిన విషయం తెలిసిందే. అంతేకాకుండా ఆయన పార్టీకి రాజీనామా లేఖ పంపారు. ఈ నేపథ్యంలోనే ఎంపీ రేవంత్ వారిని బుజ్జగించే ప్రయత్నాలు మొదలుపెట్టారు.
ప్రస్తుతం కాంగ్రెస్ నుంచి కాకుండా… స్వంతంత్ర అభ్యర్థిగా పోటీలో ఉండేందుకు హర్షవర్ధన్రెడ్డి నామినేషన్ దాఖలు చేశారు. దీంతో నామినేషన్ ఉపసంహరించుకోవాలని రేవంత్రెడ్డి బుజ్జగిస్తున్నారు. ప్రస్తుతం తొందరపడవద్దని, పార్టీలో మంచి అవకాశం ఉంటుందంటూ సూచిస్తున్నారు. పార్టీని వీడవద్దని, స్వతంత్రంగా బరిలో ఉండరాదంటూ… నేనున్నా… చూసుకుంటా అంటూ భరోసా ఇచ్చే ప్రయత్నాలు చేస్తున్నారు.
