అతిలోక సుందరిగా.. పాయల్ డ్రీమ్

పాయల్ రాజ్‌పుత్.. ఆర్ఎక్స్ 100 సినిమాతో తెలుగు కుర్రకారు మనసుదోచిన భామ. తొలి సినిమాలోనే నెగెటివ్ రోల్ చేసిన పాయల్.. తన పాత్రకు పూర్తి న్యాయం చేసి విమర్శకుల ప్రశంసలు అందుకుంది. అందుకుగాను అవార్డులను సైతం గెలుచుకున్న పాయల్.. ఆ తర్వాత వెంకీ మామ, డిస్కో రాజాలో సీనియర్లతో జతకట్టి మెప్పించింది. ‘సీత’ సినిమాలో స్పెషల్ సాంగ్‌తో యూత్‌ను షేక్ చేసిన అమ్మడు.. ఇప్పుడు ఏకంగా కమల్ హాసన్ ఇండియన్ 2 సినిమాలో ఐటెం సాంగ్ చేసే అవకాశం కొట్టేసింది.

ఇదిలా ఉంటే, లేట్ నైట్ అభిమానులతో సోషల్ మీడియాలో ముచ్చటించిన పాయల్ ఆసక్తికర విషయాలు పంచుకుంది. టెన్త్ క్లాస్‌లో 72%, 12 స్టాండర్డ్‌లో 64% మార్క్‌లు తెచ్చుకున్నానంటూ తన ఎడ్యుకేషన్ డిటైల్స్ షేర్ చేసిన ఈ భామ.. మార్కులు స్కోర్ చేయడంలో చాలా వెనుకబడే విద్యార్థుల్లో నేను ఒకదాన్ని అని చెప్పింది. ఇక బయోపిక్‌ల హవా నడుస్తున్న ఈ కాలంలో.. ఎలాంటి బయోపిక్ చేస్తారని నెటిజన్లు ప్రశ్నించగా.. అతిలోక సుందరి ‘శ్రీదేవి’ జీవితకథలో నటించాలనుందని తన మనసులో మాట బయటపెట్టింది. శ్రీదేవి బయోపిక్‌లో భాగం కావాలనుందని.. తన పాత్రలో జీవించాలని ఉందని చెప్పింది. ‘శ్రీదేవి తెరపై చేసిన మ్యాజిక్ సినిమాకున్న అందంపై నమ్మకం కలిగించిందని వెల్లడించింది. మరి దర్శకులు, నిర్మాతలు ఈ మాట విని ఉంటే ప్లాన్ చేసుకోవచ్చు.. ఇక్కడ శ్రీదేవి రెడీ అంటున్నారు పాయల్ అభిమానులు.