ప్రభుత్వ పాఠశాలల్లో 13 నుంచి ఆన్ లైన్ క్లాసులు

దిశ, వెబ్ డెస్క్: కరోనా వ్యాప్తితో దేశవ్యాప్తంగా పాఠశాలలన్నీ మూతపడ్డ విషయం తెలిసిందే. దీంతో విద్యార్థుల చదువు అయోమయంలో పడింది. కొన్ని ప్రయివేటు స్కూళ్లు ఆన్ లైన్ క్లాసులు మొదలుపెట్టాయి. మరి ప్రభుత్వ పాఠశాలల్లో చదువుకునే విద్యార్థుల పరిస్థితి? అందుకే ప్రభుత్వ పాఠశాల విద్యార్థుల గురించి బాగా ఆలోచించిన తమిళనాడు ప్రభుత్వం.. వారికి కూడా జులై 13 నుంచి ఆన్ లైన్ క్లాసులు నిర్వహించాలని నిర్ణయించింది. ఈ విషయాన్ని పాఠశాల విద్యాశాఖ మంత్రి సెంగోట్టయ్యన్ తెలిపారు. క్లాసుల నిర్వహణ కోసం ఐదు ప్రైవేట్ చానెల్స్ సిద్ధంగా ఉన్నాయని ఆయన తెలిపారు. ఒక్కో చానెల్.. ఒక్కో సబ్జెక్ట్ ని ప్రసారం చేస్తుందని ఆయన తెలిపారు. అందుకోసం ఇప్పటికే విద్యార్థులకు పుస్తకాలు కూడా పంపిణీ చేసినట్టు ఆయన తెలిపారు. కరోనా వల్ల చాలామంది విద్యార్థులు తమతమ పరీక్షలకు హాజరు కాలేకపోయారని.. వారందరి గురించి సీఎం తగు నిర్ణయం తీసుకుంటారని ఆయన అన్నారు.