తెరపైకి మహేశ్ అండ్ పార్టనర్ బయోపిక్
దిశ, సినిమా : మరో స్పోర్ట్స్ బయోపిక్‌కు బాలీవుడ్ సిద్ధమవుతోంది. 23 డబుల్స్‌ టైటిళ్లతో రికార్డు సృష్టించి, ఇండియన్ టెన్నిస్‌ను ఉన్నత శిఖరాలకు చేర్చిన టెన్నిస్ దిగ్గజాలు లియాండర్ పేస్, మహేశ్ భూపతి.. ఓటీటీ ప్రాజెక్ట్ కోసం మళ్లీ ఒక్కటి కాబోతున్నారు. జీ5లో ప్రసారం కానున్న ఈ ప్రెస్టీజియస్ ప్రాజెక్ట్‌ను నితేశ్ తివారి, అశ్విని అయ్యర్ తివారి తెరకెక్కించనున్నట్టు ప్రకటించారు. ఈ విషయాన్ని ట్విట్టర్ ద్వారా తెలిపిన మేకర్స్.. సిరీస్ ద్వారా ఇద్దరు లెజెండ్స్ మధ్యన రిలేషన్‌షిప్‌‌తో పాటు ఇప్పటివరకు బయటకు తెలియని అనేక విషయాలను వెల్లడించనున్నట్టు తెలిపారు. కాగా ఇండియన్ టెన్నిస్ స్టార్స్ ‘మహేశ్, పేస్’ల రియల్ స్టోరీని ఆవిష్కరించే అవకాశం దక్కడం గౌరవంగా ఉందని సోషల్ మీడియాలో పోస్ట్ చేసిన ‘బరేలీ కీ బర్ఫీ’ డైరెక్టర్ అశ్విని.. తన భర్త నితేశ్, టెన్నిస్ ద్వయంతో కలిసి ఉన్న ఫోటోను పంచుకుంది. ఈ పిక్‌పై స్పందించిన మహేశ్ భూపతి వైఫ్, మాజీ మిస్ యూనివర్స్ లారా దత్తా హుర్రే ఎమోజీతో కామెంట్ చేసింది.
