Mann Ki Baat: మన్ కీ బాత్ లో మోడీ ఏం మాట్లాడారంటే?

దిశ, నేషనల్ బ్యూరో: ప్రధాని నరేంద్ర మోడీ ‘మన్ కీ బాత్’(Mann Ki Baat) 120వ ఎపిసోడ్‌లో వివిధ అంశాలపై మాట్లాడారు. త్వరలో పలు రాష్ట్రాల్లో జరిగే ఉత్సవాల గురించి ప్రస్తావించారు. ఆదివారం నుంచి చైత్ర నవరాత్రులు ప్రారంభమవుతున్నాయని గుర్తుచేశారు. భారతీయ నూతన సంవత్సరం కూడా ఆదివారమే మొదలవుతోందన్నారు. వివిధ రాష్ట్రాల్లో పలు పండుగల జరగనున్నాయని.. ఈ సందర్భంగా ప్రజలందరికీ శుభాకాంక్షలు తెలియజేశారు. వేసవి సెలవులను విద్యార్థులు సద్వినియోగం చేసుకోవాలని మోడీ సూచించారు. ‘పరీక్షల సమయంలో వాటి గురించి చర్చించాను. త్వరలో వేసవి సెలవులు రాబోతున్నాయి. పిల్లలు వాటి కోసం వేచి చూస్తున్నారు. కొత్త అభిరుచులను సొంతం చేసుకునేందుకు ఇదే తగిన సమయం. వేసవి సెలవుల కోసం రూపొందించిన ‘మై క్యాలెండర్‌’చిన్నారులకు ఎంతగానో ఉపయోగపడుతోంది. అంబేద్కర్ జయంతి రోజు జరిగే పాదయాత్రలో పాల్గొనడంతో రాజ్యాంగ విలువల గురించి సమాచారాన్ని అందరికీ తెలియజేయగలరు’ అని మోడీ పేర్కొన్నారు.

నీటి పొదుపు

వేసవి కాలం కాబట్టి నీటిని పొదుపుగా వాడాలని మోడీ హితవు పలికారు. నీటిని సంరక్షించడం మన బాధ్యత అని అన్నారు. మనకు లభించిన సహజ వనరులను తదుపరి తరానికి అందించాలని చెప్పుకొచ్చారు. గత ఏడెనిమిదేళ్లలో దేశంలో కొత్తగా నిర్మించిన ట్యాంకులు, చెరువులు, ఇతర నీటి నిల్వల నిర్మాణాల ద్వారా నీటిని సంరక్షించినట్లు తెలిపారు. ఈ విషయంలో అందరూ ఇప్పటి నుండే ఒక ప్రణాళికను రూపొందించుకోవాలన్నారు. ఇంటి ముందు ఒక కుండలో చల్లటి నీటిని అందరికీ అందుబాటులో ఉంచండి అని మోడీ ప్రజలను కోరారు. ఇటీవల ముగిసిన ఖేలో ఇండియా పారా గేమ్స్‌(Khelo India Para Games)లో ఆటగాళ్లు తమ ప్రతిభతో అందరినీ ఆశ్చర్యపరిచారన్నారు. క్రీడాకారులు18 జాతీయ రికార్డులను సృష్టించారని చెప్పుకొచ్చారు. అంతేకాకుండా, ఢిల్లీలో జరిగిన ఫిట్ ఇండియా కార్నివాల్‌లో వివిధ ప్రాంతాల నుండి సుమారు 25 వేల మంది పాల్గొన్నట్లు తెలిపారు. వారందరి లక్ష్యం ఒక్కటే ‘ఫిట్‌గా ఉండటం.. ఫిట్‌నెస్ గురించి అందరికీ అవగాహన కల్పించడం’ అని ప్రధాని పేర్కొన్నారు.

వస్త్ర వ్యర్థాలపై..

దేశంలో వస్త్ర వ్యర్థాలు కొత్త సవాలుగా మారాయన్నారు. పాత దుస్తులను పారవేసినప్పుడు వాటిలో ఒక శాతం మాత్రమే రీసైకిల్ అవుతుందన్నారు. ప్రపంచంలో అత్యధిక వస్త్ర వ్యర్థాలు ఉత్పత్తి అయ్యే మూడవ దేశం భారత్‌ అని గుర్తుచేశారు. ఈ సవాలును ఎదుర్కొనేందుకు వివిధ స్టార్టప్‌లు పాత బట్టలు, బూట్లు, చెప్పులను రీసైక్లింగ్ చేసి ఉపయోగకరంగా మారుస్తున్నాయన్నారు. మరోవైపు, యోగా దినోత్సవానికి ఇక కొద్ది రోజులు మాత్రమే ఉందని గుర్తుచేశారు. ‘యోగాను నిత్యజీవితంలో భాగంగా చేసుకోవాలి. ప్రపంచ మానవాళికి భారత్‌ ఇచ్చిన బహుమతి యోగా. ఇది భవిష్యత్ తరానికి ఉపయోగపడుతుంది. యోగా సాయంతో ప్రపంచాన్ని ఆరోగ్యవంతంగా తీర్చిదిద్దేందుకు ప్రయత్నిద్దాం. ప్రస్తుతం పెద్ద సంఖ్యలో యువత యోగాను అభ్యసిస్తున్నారు. అలాగే ఆయుర్వేదాన్ని కూడా ఆశ్రయిస్తున్నారు’ అని ప్రధాని పేర్కొన్నారు.