బ్రేకింగ్: మనీష్ సిసోడియాకు మరోసారి రిమాండ్ పొడగింపు

దిశ, వెబ్‌డెస్క్: ఢిల్లీ లిక్కర్ స్కామ్‌లో కీలక పరిణామం చోటు చేసుకుంది. ఈ కేసులో అరెస్ట్ అయిన ఢిల్లీ మాజీ డిప్యూటి సీఎం మనీష్ సిసోడియాకు రౌస్ అవెన్యూ కోర్టు మరోసారి రిమాండ్ పొడగించింది. ఈ నెల 20వ తేదీ వరకు మనీష్ సిసోడియాకు రౌస్ అవెన్యూ కోర్టు జ్యుడీషియల్ కస్టడీ విధించింది. దీంతో మనీష్ సిసోడియాను తీహార్ జైలుకు తరలించనున్నారు. కాగా, ఢిల్లీ లిక్కర్ స్కామ్ కేసులో సిసోడియాను కస్టడీలోకి తీసుకున్న సీబీఐ వారం రోజుల పాటు ప్రశ్నించింది. ఇవాళ్టితో కోర్టు ఇచ్చిన కస్టడీ గడువు ముగియడంతో సీబీఐ అధికారులు సిసోడియాను కోర్టులో హాజరుపర్చారు.

ఇక, ఈ కేసులో సిసోడియాను గత నెల 26న సీబీఐ అరెస్ట్ చేసి 27న కోర్టులో హాజరు పరుచగా తొలుత ఐదు రోజులు ఆ తర్వాత మరో రెండు రోజుల పాటు విచారణకు కోర్టు పర్మిషన్ ఇచ్చింది. లిక్కర్ పాలసీ రూపకల్పన, అమలులో జరిగిన అక్రమాలు, ఎక్సైజ్ శాఖ మంత్రిగా సిసోడియా తీసుకున్న నిర్ణయాలు, కనపడకుండా పోయిన ఫైల్స్, చేతులు మారిన ముడుపులు, మద్యం వ్యాపారులకు అనుకూలంగా పాలసీ రూపకల్పన, నిందితులతో ఉన్న సంబంధాలపై సిసోడియాను సీబీఐ ప్రశ్నించింది.