సింగపూర్ లో మోదీకి ఘనస్వాగతం.. డోలు వాయించిన ప్రధాని!
దిశ, వెబ్ డెస్క్: భారత ప్రధాని నరేంద్ర మోదీ.. రెండు రోజుల పర్యటన నిమిత్తం సింగపూర్ చేరుకున్నారు. బుధవారం బ్రూనై పర్యటన ముగించుకొని సింగపూర్ చేరుకున్న మోదీకి ఘన స్వాగతం లభించింది. అక్కడ ఉన్న ప్రవాస భారతీయులు మోదీకి ఘన స్వాగతం పలికారు. ఈ సందర్భంగా మోదీ డోలు వాయించి వారిని ఉత్సాహపరిచారు. తర్వాత ఎన్నారైలతో కలిసి ముచ్చటించారు.
సింగపూర్ పర్యటనలో భాగంగా .. ఇరు దేశాల ద్వైపాక్షిక సంబంధాలపై ఒప్పందాలు జరగనున్నాయి. చివరిసారిగా 2018 లో సింగపూర్ పర్యటనకు వెళ్లిన మోదీ, మళ్లీ ఇప్పుడు మరోసారి అక్కడ పర్యటిస్తున్నారు. మోదీ వెంట విదేశాంగ మంత్రి జై శంకర్, జాతీయ భద్రతా సలహాదారు అజిత్ దోవల్ తో పాటు ఇతర అధికారులు ఉన్నారు. కాగా భారత్, సింగపూర్ వ్యూహాత్మక భాగస్వామ్య పురోగతిపై నేతలు సమీక్షించుకుంటారని బ్రూనై, సింగపూర్ పర్యటనకు ముందు విదేశీ వ్యవహారాల మంత్రిత్వ శాఖ వెల్లడించింది.
