kanganaranaut: ‘ఎమర్జెన్సీ’ సినిమా మరోసారి వాయిదా.. బరువెక్కిన హృదయంతో అంటూ కంగనా ఎమోషనల్ పోస్ట్

దిశ, సినిమా: బాలీవుడ్ ఫైర్ బ్రాండ్ కంగనా రనౌత్ గురించి ప్రత్యేకంగా పరిచయం చేయాల్సిన పనిలేదు. ఒకవైపు సినిమాలు చేస్తూనే.. రాజకీయాల్లోనూ రాణిస్తోంది. ప్రస్తుతం ఆమె నటించిన ‘ఎమర్జెన్సీ’ చిత్రం విడుదలకు సిద్ధంగా ఉంది. ఈ మూవీ మాజీ ప్రధాని ఇందిరాగాంధీ జీవిత కథ ఆధారంగా తెరకెక్కించారు. అయితే ఈ సినిమా షూటింగ్ పూర్తి చేసుకొని సెప్టెంబర్ 6న విడుదల కావాల్సి ఉండగా.. కొన్ని అనివార్య కారణాల వల్ల వాయిదా పడింది. ఇందులోని కొన్ని సీన్స్‌పై అభ్యంతరం వ్యక్తం చేయడంతో సెన్సార్ బోర్డ్ సర్టిఫికెట్ జారీ చేయలేదు. ఈ క్రమంలో ఎమర్జెన్సీ సెన్సార్ సర్టిఫికెట్ కోసం మూవీ టీమ్ బాంబే హైకోర్టును సంప్రదించగా అక్కడ కూడా ఊరట లభించలేదు.

దీంతో ఎమర్జెన్సీ మరోసారి వాయిదా పడింది. ఈ విషయాన్ని తెలుపుతూ కంగనా ఇన్‌స్టాగ్రామ్ వేదికగా ఓ ఎమోషనల్ పోస్ట్ షేర్ చేసింది. ‘ఎమర్జెన్సీ మరోసారి వాయిదా పడిందని చెప్పడానికి బాధగా అనిపిస్తుంది. సెన్సార్ బోర్డు నుంచి సర్టిఫికెట్ కోసం మేము ఇంకా ఎదురుచూస్తున్నాము. ఈ విషయాన్ని బరువెక్కిన హృదయంతో చెబుతున్నాను. అర్థం చేసుకోవాలని ప్రేక్షకులను రిక్వెస్ట్ చేస్తున్నాను. అలాగే కొత్త విడుదల తేదీని తొందరలోనే ప్రకటిస్తాము’ అని రాసుకొచ్చింది. దీంతో ఈ విషయం తెలుసుకున్న నెటిజన్లు ఆమెకు సపోర్ట్‌గా నిలుస్తున్నారు.