ఎమ్మెల్యే రాజగోపాల్ రెడ్డి సంచలన వ్యాఖ్యలు

దిశ, మునుగోడు: మునుగోడు ఎమ్మెల్యే కోమటిరెడ్డి రాజగోపాల్ రెడ్డి శనివారం సంచలన వ్యాఖ్యలు చేశారు. చండూరు మండలం బొడంగిపర్తి గ్రామంలో తెలంగాణ రాష్ట్ర వర్కింగ్ జర్నలిస్ట్ ఫోరం అధ్యక్షుడు పల్లె రవికుమార్ తండ్రి దశ దిన కర్మ కార్యక్రమంలో ఆయన పాల్గొన్నారు. అదే కార్యక్రమానికి హాజరైన నల్లగొండ వరంగల్ ఖమ్మం పట్టభద్రుల ఎమ్మెల్సీ అభ్యర్థి డాక్టర్ చెరుకు సుధాకర్‌తో ఆయన కాసేపు ముచ్చటించారు. ఈ సందర్భంగా ఎమ్మెల్సీ అభ్యర్థి చెరుకు సుధాకర్‌తో ఆయన మాట్లాడుతూ… 'మీరు తెలంగాణ ఉద్యమంలో కీలకంగా పాల్గొన్నారు.

మిగతా పోటీదారులతో నేను మాట్లాడి ఏకాభిప్రాయం తీసుకొచ్చి.. మీకు మద్దతు ఇవ్వాలని కోరుతాను. రాజగోపాల్ రెడ్డే కాదు, నల్లగొండ, ఖమ్మంలో ఎవరిని అడిగినా చెరుకు సుధాకర్‌ను ఎవరూ కాదనలేరు. చెరుకు సుధాకర్ నిలబడితే కాదనేటోల్లు ఎవరు లేరు. మీరు వివాద రహిత వ్యక్తి. నలుగురు పోటిలో నిలబడకుండా ఏకాభిప్రాయంతో ఒకతాటి పైకి రావాలి. లేదంటే అధికార పార్టీకే లాభం చేకూరుతుంది. అందరూ కలిసి తెరాసను ఓడగొట్టాలని మీకు అత్యధిక మెజారిటీ రావాలని కోరుకుంటున్నాను. మీ ఎన్నికకు నా పూర్తి సహకారం ఉంటుంది. జనవరి 9 తర్వాత అందరం కలిసి… పోటీకి సిద్దమవుతున్న మిగతా అభ్యర్థులను విరమింపచేసే ప్రయత్నం చేద్దాం' అన్నారు.