వారికి త్వరలో పెండింగ్ జీతాలు.. మంత్రి హరీష్ రావు గుడ్ న్యూస్

దిశ, తెలంగాణ బ్యూరో: గచ్చిబౌలిలోని టిమ్స్​తో పాటు కింగ్ కోఠి హాస్పిటల్స్​లో సాధారణ వైద్య సేవలను తిరిగి ప్రారంభించేందుకు సర్కార్​ ఏర్పాట్లు చేస్తున్నది. క‌రోనా తీవ్రత తగ్గడంతో 350 ప‌డ‌క‌లు ఉన్న కింగ్ కోఠి జిల్లా ద‌వాఖాన‌లో అన్ని రకాల వైద్యసేవలు అందించాలని వైద్యాధికారులకు ఆదేశాలిచ్చింది. కరోనా నోడల్​ సెంటర్​ గా ఉన్న టిమ్స్​ లోనూ కేవలం 200 పడకలు మినహాయించి మిగతా బెడ్లన్నీ సాధారణ వైద్యసేవలకు కేటాయించాలని సర్కార్​ సూచించింది. ఈ మేరకు వైద్యారోగ్యశాఖ మంత్రి హరీష్​ రావు గురువారం హైదరాబాద్​లోని మర్రి చెన్నారెడ్డి మానవ వనరుల అభివృద్ధి కేంద్రంలో అధికారులతో సమీక్ష నిర్వహించారు. ఈ సందర్భంగా మంత్రి మాట్లాడుతూ… టిమ్స్​ ఆసుపత్రి బకాయిలు చెల్లిస్తామని హామీ ఇచ్చారు. దీంతో పాటు పెండింగ్​ లో ఉన్న సిబ్బంది జీతాలను అందిస్తామన్నారు.

మెడికల్​ కాలేజీల్లో స్పీడ్​ పెంచాలి

ప్రభుత్వం ప్రతిష్టాత్మకంగా తలబెట్టిన 8 కొత్త మెడికల్​ కాలేజీల నిర్మాణాలను వేగంగా పూర్తి చేయాలని మంత్రి హరీష్​రావు సూచించారు. నేషనల్ ​మెడికల్​ కమిషన్​ తనిఖీలు చేసేలోపు పనులను పూర్తి చేయాలన్నారు. మౌలిక వసతులు, మ్యాన్​ పవర్​ ను సమకూర్చాలన్నారు. అంతేగాక కొత్త మల్టీ స్పెషాలిటీ ఆసుప‌త్రులతో పాటు వ‌రంగ‌ల్‌లోని మ‌ల్టీ సూప‌ర్ స్పెషాల్టీ ఆసుప‌త్రి నిర్మాణాలను వేగంగా పూర్తి చేయాలన్నారు. ఇబ్బందులు ఉంటే ప్రభుత్వానికి తెలియజేయాలని మంత్రి హరీష్ ​కోరారు.

వ్యాక్సినేషన్​లో వేగం

రాష్ట్రవ్యాప్తంగా వ్యాక్సినేషన్​ లో వేగం పెంచాలని మంత్రి హరీష్​రావు స్పష్టం చేశారు. ఇప్పటికే జాతీయ స‌గ‌టును మించి వ్యాక్సినేష‌న్ ను నిర్వహించినప్పటికీ వైరస్​ వ్యాప్తి నియంత్రించేందుకు మరింత స్పీడప్​ చేయాలన్నారు. ఇప్పటివరకు రాష్ట్రవ్యాప్తంగా 84.3 శాతం మందికి మొద‌టి డోస్ పూర్తి కాగా.. 38.5 శాతం మందికి రెండో డోస్ పూర్తి చేసినట్లు వెల్లడించారు. వ్యాక్సినేష‌న్ లో వేగం పెంచేందుకు శనివారం అన్ని జిల్లాల వైద్యాధికారులతో వీడియో కాన్ఫరెన్స్​ నిర్వహించారు. అంత‌కుముందు కేంద్ర ఆరోగ్యశాఖ మంత్రి మన్సుక్​ మాండవీయ నిర్వహించిన వీడియో కాన్ఫరెన్స్​ లో మంత్రి హరీష్​రావు పాల్గొన్నారు. కరోనా కేసులు, వ్యాక్సినేషన్​ కార్యక్రమాల పరిస్థితిని వివరించారు. ఈ కార్యక్రమంలో ఆరోగ్యశాఖ కార్యదర్శి రిజ్వీ, సీఎం ఓఎస్డీ డా.గంగాధర్​, డీఎంఈ డా.రమేష్​రెడ్డి, కాళోజీ వ‌ర్సిటీ వీసీ క‌రుణాక‌ర్ రెడ్డిలు పాల్గొన్నారు.

కేంద్ర మంత్రి కిషన్ రెడ్డిని అడ్డంగా బుక్ చేసిన హరీష్ రావు