Oxytocin : లవ్ హార్మోన్ తగ్గిందా..? మీలో ఆ సమస్య తలెత్తినట్టే!

దిశ, ఫీచర్స్ : ఏదో ఒక విషయంలో తరచుగా ఆందోళన వేధిస్తోందా? ప్రేమ, ఉత్సాహం, నమ్మకం, ఆసక్తి వంటివి తగ్గిన అనుభూతికి లోనవుతున్నారా? పరధ్యానంలో ఉంటూ ప్రియమైన వ్యక్తిని నిర్లక్ష్యం చేస్తున్నారా? అతి ఆలోచనలతో అసలు విషయాలు మర్చిపోతున్నారా? అయితే మీలో లవ్ హార్మోన్ ( Oxytocin ) తగ్గి ఉండవచ్చు! ఎందుకంటే ఇది తగినంతగా ఉత్పత్తి కానప్పుడే చాలామంది ఇలాంటి ప్రతికూల భావాలతో పోరాడుతుంటారని శాస్త్రవేత్తలు చెబుతున్నారు.

నిజానికి లవ్ హార్మోన్‌గా పిలువబడే ఆక్సిటోసిన్ ఒక పెప్టైడ్ అండ్ న్యూరో పెప్టైడ్ హార్మోన్. ఇది మెదడులోని హైపోథామలస్‌లో ఉత్పత్తి చేయబడి, పిట్యూటరీ గ్రంధి ద్వారా విడుదలవుతుంది. సోషల్ బాండింగ్, అటాచ్‌మెంట్స్ అండ్ రిలేషన్‌షిప్స్‌లో కీలకపాత్ర పోషిస్తుంది. ఇది తరచుగా ప్రేమ, నమ్మకం, ఆప్యాయత(affection) వంటి భావాలతో ముడిపడి ఉంటుంది. ఎప్పుడైతే ఒక వ్యక్తిలో ఆక్సిటోసిన్ విడుదల సక్రమంగా ఉండదో ఆ వ్యక్తి మానసిక రుగ్మతల బారిన పడే అవకాశం కూడా ఉంటుంది. అలాగే పరోక్షంగా ప్రేమ, ఆప్యాయతలు, అనుబంధాలు వంటి అంశాల్లో ప్రతికూల భావాలతో పోరాడే చాన్స్ ఉటుందని నిపుణులు అంటున్నారు.

టోక్యో యూనివర్సిటీ ఆఫ్ సైన్స్‌కు చెందిన పరిశోధకుల ప్రకారం.. ప్రస్తుతం అనేకమంది ఎదుర్కొంటున్న సమస్యల్లో ఆక్సిటోసిన్ తక్కువగా ఉత్పత్తి కావడం ఒకటి. తద్వారా జీవితంలో ఇబ్బందులు, అనారోగ్యాలు వంటివి కూడా ఎదుర్కొంటున్నారు. అనుబంధాలు, భావోద్వేగాల నిర్వహణలో కీలపాత్ర పోషించే లవ్ హార్మోన్ దీర్ఘకాలంపాటు సరిగ్గా ఉత్పత్తి కాకపోతే నేర్చుకునే సామర్థ్యం, జ్ఞాపక శక్తి తగ్గే అవకాశం కూడా ఉందని నిపుణులు చెబుతున్నారు. ఎందుకంటే మతిమరుపు, డెమెన్షియా, అల్జీమర్స్ వంటి రుగ్మతలను అడ్డుకోవడంలో ఇది కీ రోల్ పోషిస్తుంది. ఉత్తేజాన్ని, ఉత్సాహాన్ని, సంతోషాన్ని ప్రేరేపించడం ద్వారా మానవులకు మేలు చేస్తుంది. స్ట్రెస్, యాంగ్జైటీస్, కోపం వంటివి తగ్గిస్తుంది.

లవ్ హార్మోన్ బెనిఫిట్స్

సామాజిక సంబంధాలను, వ్యక్తుల మధ్య అనుబంధాలను పెంపొందించడంలో సహాయపడుతుంది. ఒత్తిడి, ఆందోళనలను దూరం చేస్తుంది. శరీరంలో నొప్పి, వాపు వంటి సమస్యల నుంచి ఉపశమనం పొందడంలో మేలు చేస్తుంది. వ్యక్తుల మధ్య నమ్మకాన్ని, సానుభూతిని పెంచుతుంది. అధిక రక్తపోటును తగ్గించడం ద్వారా గుండెకు, మొత్తం శరీర ఆరోగ్యానికి మేలు చేస్తుంది.

రిలీజ్ అయ్యే సందర్భాలు

ఆక్సిటోసిన్ విడుదల అనేది నిరంతర జీవక్రియలో భాగం. ఇది సహజంగానే విడుదల అవుతుంది. అయితే ఎక్కువగా సంతోషకరమైన సందర్భాల్లో విడుదల అవుతుంది. ఇది మెదడులోని పిట్యూటరీ గ్రంధిలో రిలీజ్ అవుతుంది. భౌతిక స్పర్శ అంటే.. ఇష్టమైన వ్యక్తులు కౌగిలించుకోవడం, ముద్దు పెట్టుకోవడం వల్ల కూడా విడుదలవుతుంది. అట్లనే ప్రియమైన వారితో గడపడం, మాట్లాడటం, సోషల్ యాక్టివిటీస్‌లో పాల్గొనడం, స్ట్రాంగ్ రిలేషన్స్ ఏర్పర్చుకోవడం వంటి సందర్భాల్లోనూ లవ్ హార్మోన్ రిలీజ్ అవుతుంది. రెగ్యులర్‌గా వ్యాయామాలు, ముఖ్యంగా ఏరోబిక్ వ్యాయామం ఆక్సిటోసిన్ విడుదలను ప్రేరేపిస్తుంది. మైండ్ ఫుల్‌‌నెస్, మెడిటేషన్, మ్యూజిక్ వినడం, ప్రకృతిని ఆస్వాదించడం, రిలాక్సేషన్ వంటివి ఆక్సిటోసిన్ స్థాయిలను పెంచుతాయి.

*నోట్ : పైవార్తలోని సమాచారం ఇంటర్నెట్ ఆధారంగా పలు హెల్త్ జర్నల్స్ నుంచి సేకరించబడింది. అనుమానాలు ఉంటే నిపుణులను సంప్రదించగలరు.