Phool Makhana: ఫూల్ మఖానాలతో జరిగే మేలు ఏంటి? నిజాలు తెలుసుకోండి
దిశ, వెబ్‌డెస్క్: Phool Makhana: తీపి వంటలంటే చాలా మంది ఇష్టంగా తింటుంటారు. ఇంట్లో లేదా బయట ఫంక్షన్లలో ఇతర ఎక్కడైనా సరే తీపి వంటకాలు కనిపిస్తే చాలు రుచి చూసే వరకు వదలిపెట్టరు. తియ్యని వంటకాలను చూడగానే చాలా మందికి నోట్లో నీళ్లూరుతుంటాయి. అయితే తియ్యని వంటకాల కోసం ఎక్కువగా ఫూల్ మఖానాలను ఉపయోగిస్తుంటారు. వీటిని ఆయా వంటకాల్లో వేసినట్లు కూడా చాలా మందికి తెలియదు. ఇక ఫూల్ మఖనాలను చాలా మంది బయట మార్కెట్లో చూసే ఉంటారు. వీటిని లోటస్ సీడ్స్, తామర విత్తనాలు అని కూడా పిలుస్తుంటారు. తామర విత్తనాలను వేయించి వీటిని తయారు చేస్తారు. ఫూల్ మఖనాలు కాస్త ఖరీదు ఎక్కువగానే కలిగి ఉంటాయి. అయితే ఇవి అందించే ప్రయోజనాలు మాత్రం అద్భుతంగా ఉంటాయనే చెప్పవచ్చు. ఫూల్ మఖానాలను తరచుగా ఆహారంలో భాగం చేసుకోవడం వల్ల అనేక అద్భుతమైన అరోగ్యకరమైన ప్రయోజనాలను పొందవచ్చని పోషకాహార నిపుణులు చెబుతున్నారు.
ఫూల్ మఖనాలలో ఫైబర్ అధిక మోతాదులో ఉంటుంది. అలాగే వీటిల్లో క్యాలరీలు కూడా తక్కువగానే ఉంటాయి. వీటిని తింటే ఎక్కువ సేపు కడుపు నిండుగా ఉన్నట్లు అనిపిస్తుంది. ఆకలి అనిపించదు. దీంతో తీసుకునే ఆహారం పరిమాణం కూడా తగ్గుతుంది. ఫలితంగా అధిక బరువును తగ్గించుకోవచ్చు. బరువు తగ్గాలని చూస్తున్నవారు తమ డైట్ ప్లాన్ లో ఫూల్ మఖనాలను చేర్చుకుంటే ఎంతో ప్రయోజనం ఉంటుంది. అలాగే వీటిని తింటే గుండె కూడా ఆరోగ్యంగా ఉంటుంది. ఎందుకంటే ఇందులో మెగ్నీషియం అధిక మోతాదులో ఉంటుంది. సోడియం తక్కువ ఉంటుంది. అందుకే వీటిని తింటే బీపీ అదుపులో ఉంటుంది.
ఫూల్ మఖనాలలో యాంటీ యాక్సిడెంట్లు అధికంగా ఉంటాయి. ఇవి ఆక్సీకరణ ఒత్తిడిని తగ్గిస్తాయి. దీంతో గుండె జబ్బులు రాకుండా అడ్డుకుంటాయి. అధ్యయనాలు చెబుతున్న ప్రకారం ఫూల్ మఖనాలను తినడం వల్ల గుండె ఆరోగ్యంగా ఉంటుందట. గుండె జబ్బులు రాకుండా చూసుకోవచ్చని నిపుణులు చెబుతున్నారు. ఫూల్ మఖానాలను తింటే కిడ్నీ లు కూడా ఆరోగ్యంగా ఉంటాయి. కిడ్నీల్లో ఉండే వ్యర్థాలు బయటకు పోతాయి. దీంతో కిడ్నీల్లో రాళ్లు ఏర్పడకుండా చూసుకోవచ్చు.
అయితే ఫూల్ మఖనాలను తింటే ఆరోగ్య ప్రయోజనాలు ఉన్నప్పటికీ కొందరు వీటిని తినకపోవడమే మంచిది. గ్యాస్, అజీర్తి, మలబద్ధకం వంటి సమస్యలు వచ్చే అవకాశం ఉంటుంది. అలాంటి వారు ఫూల్ మఖనాలను తినడం మానుకోవడాలి. ఇక ఫూల్ మఖనాలను మోతాదులో తింటే ఏమీ అవ్వదు. కానీ అధికంగా తింటే మాత్రం షుగర్ లెవల్స్ పెరిగే ప్రమాదం ఉంటుంది. కాబట్టి షుగర్ వ్యాధి ఉన్నవారు వీటిని తింటే అప్రమత్తంగా ఉండాలి. అలాగే కొందరికి వీటిని తింటే అలర్జీలు వచ్చే అవకాశం ఉంటుంది. ఫుడ్ అలర్జీ సమస్య ఉన్నవారు కూడా వీటిని తినకపోవడమే మంచిది. ఇక మిగిలిన ఎవరైనా సరే ఫూల్ మఖానాలను తినవచ్చు.
