కన్నీళ్లు పెడతాడని ఊహించలేదు.. రేవంత్ వ్యాఖ్యలకు ఈటల సమాధానం

దిశ, వెబ్‌డెస్క్: టీపీసీసీ చీఫ్ రేవంత్ రెడ్డి వ్యాఖ్యలకు హుజురాబాద్ బీజేపీ ఎమ్మెల్యే ఈటల రాజేందర్ సమాధానం చెప్పారు. ఆదివారం ఆయన మీడియాతో మాట్లాడుతూ.. కాంగ్రెస్, బీఆర్ఎస్‌లు చెట్టాపట్టాలేసుకొని తిరిగాయని విమర్శించారు. రాహుల్ గాంధీ అనర్హత వేటుపై తెలంగాణ కాంగ్రెస్ నేతల కంటే ఎక్కువగా బీఆర్ఎస్ నేతలు బాధ పడ్డారని గుర్తుచేశారు. తాను రాజకీయంగా మాట్లాడానని స్పష్టం చేశారు. ఎక్కడా వ్యక్తిగతంగా రేవంత్ రెడ్డి పేరు ప్రస్తావించలేదని తెలిపారు. నిన్నటినుంచి ఇష్టానుసారం రేవంత్ రెడ్డి సంస్కార హీనంగా మాట్లాడుతున్నారని అసహనం వ్యక్తం చేశారు. రాజకీయ నేతలు కన్నీళ్లు పెట్టడం మంచిది కాదని సెటైర్ వేశారు. అసలు రేవంత్ కన్నీళ్లు పెడతారని తాను అనుకోలేదని అన్నారు. ఒక ధీరుడు, పోరాట యోధుడు ఎప్పుడూ కన్నీళ్లు పెట్టబోడని తెలిపారు. తాము ప్రజల కోసం జైలుకు పోతే.. రేవంత్ ఓటుకు నోటు కేసులో జైలుకు వెళ్లారని విమర్శించారు.