వైఎస్‌ను తిడుతుంటే ఆ మంత్రులు గాజలు తొడుక్కున్నారా.. ?
దిశ, ఏపీ బ్యూరో: దివంగత సీఎం వైఎస్ రాజశేఖర్‌రెడ్డిపై తాడిపత్రి మున్సిపల్ చైర్మన్, టీడీపీ కీలకనేత జేసీ ప్రభాకర్‌రెడ్డి ఆసక్తికర వ్యాఖ్యలు చేశారు. వైఎస్ రాజశేఖర్‌రెడ్డి తనకు ఇష్టమైన నాయకుడు, ఆప్తుడు అని చెప్పుకొచ్చారు. అయితే తెలుగు రాష్ట్రాల మధ్య నెలకొన్న జలవివాదాల నేపథ్యంలో తెలంగాణ మంత్రులు రాజశేఖర్‌రెడ్డిపై చేస్తున్న విమర్శలను ఆయన ఖండించారు. తెలంగాణకు ద్రోహం చేశాడు…రాక్షసుడు అంటూ వ్యాఖ్యలు చేయడంపై మండిపడ్డారు.
రాజశేఖర్‌రెడ్డి లాంటి వ్యక్తిని రాక్షసుడు అంటారా? అంటూ ఆగ్రహం వ్యక్తం చేశారు. తెలంగాణ మంత్రులు వైఎస్ఆర్‌ను బండ బూతులు తిడుతుంటే ఏపీ మంత్రులు ఏం చేస్తున్నారని నిలదీశారు. జగన్ కేబినెట్‌లో కూడా బండ బూతులు తిట్టే మంత్రులు ఉన్నారని వారంతా ఇప్పుడేంచేస్తున్నారని ప్రశ్నించారు. చంద్రబాబుపై విరుచుకుపడే వారంతా ఇప్పుడు గాజులు తొడుక్కున్నారా? అంటూ ఘాటు వ్యాఖ్యలు చేశారు. మరోవైపు హైదరాబాద్‌లో సెటిలర్స్ ఎవరని నిలదీశారు. తమ పిల్లలు హైదరాబాద్‌లోనే పుట్టారని.. అక్కడే చదువుకున్నారని వారు సెటిలర్స్ అవుతారా అని జేసీ ప్రభాకర్ రెడ్డి కీలక వ్యాఖ్యలు చేశారు.
