డొమెస్టిక్ వాటర్ వినియోగానికి ‘ఆధార్ బయోమెట్రిక్’
దిశ, తెలంగాణ బ్యూరో : డొమెస్టిక్ వినియోగదారుల ఆధార్ అనుసంధాన ప్రక్రియను మ‌రింత సుల‌భ‌త‌రం చేయడానికి సెక్షన్‌కు ఒక ఆధార్ బయోమెట్రిక్ ప‌రిక‌రాన్ని ఏర్పాటు చేస్తున్నామని జలమండలి ఎండీ ఎం.దానకిషోర్ తెలిపారు. నెల‌కు 20 వేల ఉచిత తాగునీటి ప‌థ‌కం అమ‌లు పురోగ‌తిపై మంగ‌ళ‌వారం అధికారులతో స‌మీక్షా సమావేశం నిర్వహించారు. దానకిషోర్ మాట్లాడుతూ.. ఈ ప‌థ‌కానికి సంబంధించిన ప్రక్రియను మ‌రింత వేగ‌వంతం చేయడానికి చ‌ర్యలు తీసుకోవాల‌న్నారు.
డొమెస్టిక్ స్లమ్ వినియోగదారుల కోసం ఇప్పటికే జలమండలి శిక్షణ ఇచ్చిన మీట‌ర్ రీడ‌ర్లు వినియోగదారుల ఇంటింటికి వెళ్లి ఈ ప్రక్రియను పూర్తి చేస్తున్నారన్నారు. ఇప్పటికే ఫంక్షనల్ మీటర్లు లేని వారు, మీటర్లు ప‌ని చేయ‌ని వారు తమ కనెక్షన్లకు మీటర్లు ఏర్పాటు చేసుకున్న తేదీ నుంచి ఈ పథకాన్ని పొందేందుకు అర్హులు అవుతారని పేర్కొన్నారు. ఈ కార్య క్రమంలో ఎగ్జిక్యూటివ్ డైరెక్టర్ స‌త్యనారాయ‌ణ, రెవెన్యూ డైరెక్టర్ విఎల్ ప్రవీణ్‌కుమార్, ఎం.స్వామి పాల్గొన్నారు.
