మెగా హీరో మూవీ ఓటీటీలో విడుదలవుతుందా?

దిశ, వెబ్ డెస్క్ :
లాక్‌డౌన్‌ కారణంగా సినిమాల హాళ్లన్నీ మూసేశారు. దీంతో షూటింగ్‌ పూర్తి చేసుకున్న సినిమాలన్నీ విడుదల కాకుండా ఆగిపోయాయి. కరోనా కేసులు తగ్గకపోవడంతో ఇప్పట్లో థియేటర్లు తెరిచే అవకాశాల్లేవు. కాగా ఇప్పటికే విడుదల తేదీని ప్రకటించిన సినిమాలన్నీ ప్రత్యామ్నాయంగా ఓటీటీ ప్లాట్‌ఫామ్ వైపు అడుగులు వేస్తున్నాయి. తెలుగు, తమిళ, కన్నడ, మళయాల, హిందీ భాషలకు చెందిన ఎన్నో చిత్రాలు ఓటీటీలో విడుదల తేదీని ప్రకటించాయి కూడా. తాజాగా మెగా హీరో సాయిధరమ్ తేజ తమ్ముడు వైష్ణ‌వ్ తేజ్ హీరోగా నటించిన తొలి చిత్రం ‘ఉప్పెన’ కూడా ఈ జాబితాలో చేరినట్లు సమాచారం. ఇప్ప‌టికే అమెజాన్ ప్రైమ్ నిర్వాహకులు, ఉప్పెన నిర్మాత‌ల‌కి భారీ డీల్ ఇవ్వ‌డంతో ఓటీటీలోనే విడుద‌ల చేయాల‌ని భావిస్తున్నార‌ట‌.

ఇప్పటికే ఈ చిత్రంలోని పాటలు సంగీతాభిమానుల హృదయాలను దోచుకున్నాయి. ‘నీ కన్ను నీలి సముద్రం’ పాట అయితే.. అతి తక్కువ సమయంలో 50 మిలియన్స్ సాధించిన పాటగా యూ ట్యూబ్‌లో రికార్డు కొల్లగొట్టింది. ఈ సినిమాకు డైరెక్టర్ సుకుమార్ కథను అందించగా, అతడి శిష్యుడు బుచ్చిబాబు దర్శకత్వం వహిస్తున్నారు. ఏప్రిల్‌లోనే విడుదల కావాల్సి ఉండగా లాక్‌డౌన్ వల్ల పోస్ట్‌పోన్ చేయాల్సి వచ్చింది. కృతి శెట్టి కథానాయికగా నటిస్తున్న ఈ చిత్రాన్ని మైత్రీ మువీ మేకర్స్, సుకుమార్ రైటింగ్స్ సంయుక్తంగా నిర్మిస్తున్నాయి.