Satyam Sundaram: మానవీయ విలువలతో కట్టిపడేసే చిత్రం 'సత్యం సుందరం'

ఇటీవల ఓటీటీలో కనిపిస్తోన్న 'సత్యం సుందరం' ప్రేక్షకుల హృదయాలను ఆకట్టుకుంది. చిన్న బడ్జెట్లో మంచి ప్రయత్నం. తెలుగు సినిమా పరిశ్రమ కలల్ని అమ్ముకుంటూ బతికేస్తుంది. విపరీతమైన ఖర్చుతో కూడుకున్న భారీ బడ్జెట్ చిత్రాలు. పనికిరాని యానిమేషన్.సృజన మిస్సయిన కళ. పబ్లిసిటీ కోసం మరలా విపరీతమైన ఖర్చు. నెలరోజుల హంగామా.ఆ తర్వాత ప్రజలు మర్చిపోతారు. ఇలాంటి సినిమాల నేపథ్యంలో,ఒక తంగలాన్, ఒక 35 చిన్న కథ కాదు, ఒక వజై నిరాశతో ఉన్న ప్రేక్షకులకు ఊపిరిని అందిస్తాయి. ఈ దారిలో వచ్చిన మంచి డబ్బింగ్ చిత్రం 'సత్యం సుందరం'.

చలింపజేసిన ఆత్మీయబంధాలు

పెళ్ళిలో ముఖం చూపించేసి, గిఫ్ట్ ఇచ్చేసి రాత్రికి రాత్రి బయలుదేరి వచ్చేస్తాను అనుకొని అయిష్టంగానే స్వగ్రామానికి బయలుదేరిన సత్యం ఆత్మీయ బంధనాలలో ఎలా ఇరుక్కున్నాడు? ఆ ఆత్మీయ అనుబంధానికి ఎలా చలించిపోయాడు? ఈ చిత్రం చూస్తే తప్ప మనకి అర్థం కాదు . నగర జీవితాల్లో బిజీ అయిపోయిన మనిషి, మెల్లమెల్లగా నాటకీయతలకు అలవాటు పడిపోయిన మనిషి ఆత్మీయత అనేది ఒకటి ఉందని మరిచిపోయే వింత పరిస్థితుల్లో జీవిస్తున్నాడు. మనిషిలోని మనిషి కన్పించడం లేదు. మనిషి తప్పిపోయాడు అనే పోస్టర్ అలవాటు అయింది. డబ్బు తప్ప, సంపద తప్ప నాలుగైదు ఫ్లాట్లు తప్ప, విలాసాలు తప్ప కుటుంబ బంధాలూ, బాంధవ్యాలూ, ఆత్మీయతలూ మరి ఇంకేమీ అవసరం లేని ఒక కొత్త రకమైన జీవితం ఈ ప్రపంచీకరణ మనకు అందించింది.

డబ్బు విలువల ముందు అన్నీ బలాదూర్

ఎంతసేపూ, ఏదో ఒకరకంగా నైతిక విలువలను గాలికొదిలేసి ధనం పోగు చేసుకోవడం, విపరీతంగా ఆ డబ్బును ప్రదర్శన చేయడం ..ఇలా సంతృప్తి, సౌందర్యం లేని, అసహజమైన జీవిత విధానం అలవాటు చేశారు పెట్టుబడిదారులు. ఫలితంగా, సున్నితమైన మానవ సంబంధాలు మెల్లమెల్లగా అంతరించిపోతున్నాయి. ఆర్థిక సంబంధాలు వాటిమధ్యకి జొరబడ్డాయి. మొత్తం మానవ సంబంధాలను ఛిన్నాభిన్నం చేశాయి. డబ్బు విలువల ముందు అన్నీ బలాదూర్. విజయానికి కూడా నిర్వచనాలు మారిపోయాయి. ఎంత పోగేసుకుంటే అంత గొప్పవాడు. ఎన్ని తప్పుడు పనులు చేస్తే అంత గొప్పవాడు. ఇలా తప్పుడు విలువలు నిజమైన విలువలుగా యువతకు అందుతున్నాయి. ఇందులో కూడా ఆనందం దొరక్క చివరికి సారాయి, మత్తు మందు, ఫోర్న్ కూడా దరికి చేరింది.

సత్యం ఎదుర్కొన్న 'సత్యం' ఇది కాదు

అత్యంత మానవీయ అనుబంధాలతో కట్టిపడేసే పలకరింపులను సత్యం ఎదుర్కొంటాడు. తనను అంతగా ఆరాధించే, తనను బావా అని ప్రేమతో పిలుస్తూ గుండెను తడిచేసే, అంతగా ప్రేమించే ఆ వ్యక్తి ఎవరో కూడా ఆయనకి గుర్తుకురాదు. తమ కుటుంబం ఆస్తి తగాదాతో ఆ గ్రామాన్ని శాశ్వతంగా విడిచిపెట్టినప్పుడు స్థలం చాలక తన సైకిల్ని అక్కడే విడిచి పెట్టేస్తారు. ఆ సైకిల్ జ్ఞాపకాలు కూడా సత్యానికి గుర్తు లేవు. కానీ, సుందరం ఆ సైకిల్ని అపురూపంగా చూసుకుంటాడు. అదే తన జీవితాన్ని మార్చిందని అనుకుంటాడు. ఇది విని సత్యం నోటమాట రాదు. ఆ సైకిల్‌ను వారు ఆ రాత్రి నడుపుతూ అద్వితీయమైన ఆనందాన్ని అనుభవిస్తారు. లండన్‌లో ఉన్న అమర్త్యసేన్ సైకిల్ ఇప్పటికీ బెంగాల్ లోని తన ఇంటిలో ఉంటుంది. మనుషుల ఆత్మీయతలు అంత ఉన్నత స్థాయిలో ఉంటాయి. రెండే రెండు పాత్రలతో చిత్రం మొత్తం ఎంత అద్భుతంగా నడుస్తుంది?

స్త్రీల పాత్రలకు ప్రణమిల్లాల్సిందే..!

మధ్య మధ్యలో అత్యంత ఆత్మీయతను అందించిన స్త్రీ పాత్రలు కనిపిస్తాయి. గొప్ప ప్రేమని వ్యక్తపరుస్తాయి. చెల్లెలు పాత్రలోనూ, సత్యం భార్య పాత్రలోనూ, కార్తీ భార్య పాత్ర లోనూ ముగ్గురు నటీమణులు పాత్రల్లో జీవం పోశారు. వీరి మాటలు తెలుగు సినిమా పాత్రల్లా అసహజంగా ఉండవు. పొడవైన వాక్యాలు ఉండవు. ఇంట్లో మాట్లాడుతున్నట్టు అత్యంత సహజంగా ఉంటాయి. చెల్లెలుకి గిఫ్ట్ ఇచ్చేసి చల్లగా జారుకుంటానని ఒక మధ్య తరగతి మనిషిలా అనుకుంటాడు సత్యం. కానీ చెల్లెలు స్పందించే తీరు మనం మర్చిపోలేం. ఎంత సహజత్వం? తెలుగు సినిమాలలో ఉండే పెద్ద పెద్ద డైలాగ్స్ లేవు. మనం రియల్ లైఫ్ లో ఎలా ఉంటామో, ఎంత సహజంగా మాట్లాడతామో,ఏ టోన్ లో మాట్లాడతామో ఇదీ అంతే. నగరాల్లో ఎంత డబ్బు సంపాదించినా ఈ ఆత్మీయతలు ఎక్కడ లభిస్తాయి?ఈ ప్రేమ ఎక్కడ దొరుకుతుంది ?ఏ రెస్టారెంట్లో ,ఏ సినిమా హాల్లో ఇంత మహత్తరమైన మానవ ప్రేమ మనకు లభిస్తుంది?

భావోద్వేగాల పరాకాష్ట

సత్యం సుందరం ఒక మంచి చిత్రం. కుటుంబం మొత్తం చూడదగ్గ మానవతా విలువల్ని అర్థం చేసే మంచి చిత్రం. మద్యపానం అన్న నెగెటివ్ అంశం విడిచిపెడితే, విస్మరిస్తే చాలా విషయాలు సహజంగా ఉన్నాయి. డబ్బింగ్‌కు సంబంధించిన చిన్న చిన్న లోపాలు విడిచి పెడితే, గుంటూరు అని చెబుతూనే తంజావూరు లొకేషన్ చూపించిన అసహజమైన సన్నివేశాలు విడిచి పెడితే చిత్రం మనకు సమయం తెలీనివ్వదు.. ఆ ప్రేమలో, ఆ ఆత్మీయతల మధ్య మనం కూడా అలా వారితో పాటు నడుచుకుంటూ మైమరిచి పోతాం.అరవింద్ స్వామి,కార్తీ నిజంగా నటనలో జీవం పోశారు. స్త్రీ పాత్రలు కూడా ముగ్గురు ఏమాత్రం తీసి పోలేదు. బావా అని అత్యంత ప్రేమతో వేల సార్లు పిలిచిన ఆ వ్యక్తి ఎవరు? ఆ ప్రేమ ఎవరిది? ఆ ఆత్మీయత ఎవరిది? సత్యంకు అర్థం కాదు....అడగలేడు...ఫీలవుతాడని. ఆ భావంతో తను పరిగెత్తుకుంటూ పారిపోయినప్పుడు సత్యం పడ్డ మానసిక వేదన చూసి తట్టుకోలేకపోతారు ప్రేక్షకులు. ఇక చిత్రం చూడాల్సిందే.. ఉద్వేగాలను అనుభవించాల్సిందే.

- కేశవ్

ఆర్థిక సామాజిక విశ్లేషకులు

98313 14213