ఆవుకు అంత్యక్రియలు

దిశ, వెబ్‌డెస్క్: నోరు తెరిచి మాట్లడలేని మూగజీవి. అయితేనేం గ్రామంలో ఇంటింటికి తిరిగి అందరికీ దగ్గరయింది. ఆ గోవుది , ఊరివాళ్లది 20 ఏళ్ల అనుబంధం..! గ్రామస్తులంతా దానిని ఎంతో ఆప్యాయంగా చూసుకునేవారు. తోటి మనుషులను జంతువుల కన్నా హీనంగా చూసే ఈ రోజుల్లో కూడా.. ఓ జంతువును కుటుంబ సభ్యుడిలా అక్కున్న చేర్చుకున్నారు. అందుకే ఆ గోవును మరణ వార్తను విని.. ఊరు ఊరంతా శోకసంద్రంలో మునిగిపోయింది. మనిషికి నిర్వహించినట్లుగానే.. గ్రామస్తులంతా కలిసి ఆవుకు కూడా శాస్త్రోక్తంగా అంత్యక్రియలు నిర్వహించారు.

ఆదిలాబాద్ జిల్లా తాంసి మండలంలోని పొన్నారి గ్రామంలో ఓ ఆవుకు స్థానికులతో 20 ఏళ్ల అనుబంధం ఉంది. ఐతే ఊరంతా అల్లారుముద్దుగా చూసుకునే హనుమండ్ల ఆవు అనారోగ్యంతో మరణించింది. తమ ఇంటి కుటుంబ సభ్యుడే చనిపోయినట్లుగా అందరూ దిగ్భ్రాంతికి లోనయ్యారు. ఆవుతో ఉన్న అనుబంధాన్ని గుర్తుచేసుకుని కన్నీరుపెట్టుకున్నారు. ఆ ఆవుకు శాస్త్రోక్తంగా అంత్యక్రియలు నిర్వహించారు. గ్రామ సర్పంచ్ సంజీవ్ రెడ్డి, ఉప సర్పంచ్ అశోక్ , గ్రామస్తులు లక్ష్మిపతి తదితరుల ఆధ్వర్యంలో ఆవుకు అంత్యక్రియలు నిర్వహించి.. కన్నీటి వీడుకోలు పలికారు. అంతేకాదు దేవతగా కొలిచే ఆ గోవుకు గ్రామంలో గుడి కట్టాలని నిర్ణయించారు.