పారిశుద్ధ్య కార్మికుడి ప్రాణం తీసిన కారు

దిశ, కూకట్​పల్లి : విధులు నిర్వహించేందుకు వెళ్తున్న జీహెచ్​ఎంసీ పారిశుద్ధ్య కార్మికుడిని వెనక నుంచి మితిమీరిన వేగంతో వచ్చిన కారు ఢీ కొట్టడంతో తీవ్ర గాయాలతో మృతి చెందాడు. ఈ సంఘటన కూకట్​పల్లి పోలీస్​ స్టేషన్​ పరిధిలో చోటు చేసుకుంది. పోలీసులు తెలిపిన వివరాల ప్రకారం జగద్గిరిగుట్ట సోమయ్య నగర్​కు చెందిన ఎదురు సుధాకర్​(32) మూసాపేట్​ సర్కిల్​ పరిధిలోని చైతన్య శానిటేషన్​ వర్కర్స్​ గ్రూప్​లో పారిశుద్ధ్య కార్మికుడిగా విధులు నిర్వహిస్తున్నాడు.

రోజు వారి మాధిరిగానే బుధవారం ఉదయం విధులకు హాజరు అయ్యేందుకు తన ద్విచక్ర వాహనంపై ఐడీఎల్​ చెరువు కట్టపై వెళ్తుండగా రంగధాముని చెరువు సమీపంలో వెనుక నుంచి మితి మీరిన వేగంతో వచ్చిన కారు సుధాకర్​ ద్విచక్ర వాహనాన్ని ఢీకొట్టింది దీంతో సుధాకర్​ కింద పడి తీవ్ర గాయాల పాలయ్యాడు. దాంతో స్థానికులు సమీపంలోని ఆసుపత్రికి తరలించారు. చికిత్స పొందుతూ సుధాకర్​ మృతి చెందాడు. సుధాకర్​ కుటుంబ సభ్యులు ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు చేస్తున్నారు.