పార్ట్‌టైం లీడర్స్.. పరేషాన్‌లో కేడర్
రంగారెడ్డి, దిశ: ఓటమికి వెరవకుండా కార్యకర్తల్లో ఉత్సాహం నింపి ముందుకు నడిపించే నాయకుడు లేకపోవడం.. కాంగ్రెస్ కార్యకర్తల్లో ఆందోళనకు కారణమవుతోంది. జాతీయస్థాయి నుంచి జిల్లాస్థాయి వరకు కాంగ్రెస్ పార్టీ నాయకత్వ సమస్యతోనే సతమతమవుతోంది. జిల్లాలో మాజీ ఎంపీ కొండా విశ్వేశ్వర్రెడ్డి ఇప్పటికీ పార్ట్‌టైం లీడర్‌గానే వ్యవహరించడం, డీసీసీ అధ్యక్షుడు చల్లా నర్సింహారెడ్డి బడంగ్పేట్, బాలాపూర్ ప్రాంతాలకే పరిమితం కావడం.. పార్టీ పురోగతికి అడ్డంకిగా మారుతోంది. జిల్లాలో కార్యకర్తలను, నాయకులను సమన్వయం చేసే సరైన నేతలు లేకపోవడం ఆ పార్టీ గెలుపు అవకాశాలను దెబ్బతీస్తోంది. నిబద్ధతతో పనిచేసే కార్యకర్తలతో జిల్లాలో బలమైన పార్టీగా ఉన్నా ఎన్నికల్లో విజయం సాధించకపోవడానికి నాయకత్వలోపమే కారణమనే వాదనలు వినిపిస్తున్నాయి. క్షేత్రస్థాయిలో పనిచేసే కాంగ్రెస్ నాయకులకు ఎటువంటి భరోసా లేకపోవడంతో వారంతా పార్టీని వీడే పరిస్థితి కనిపిస్తోంది. దీంతో నిరంతరం పార్టీ కోసం శ్రమించే కార్యకర్తలను నాయకులే మోసం చేస్తున్నట్టు అవుతోంది.
సమీపిస్తున్న జీహెచ్ఎంసీ ఎన్నికలు
గ్రేటర్ హైదరాబాద్ మున్సిపల్ కార్పొరేషన్(జీహెచ్ఎంసీ) ఎన్నికలు దగ్గరలోనే ఉన్నాయి. అయినా ఇప్పటికీ కాంగ్రెస్ ఎలాంటి దిద్దుబాటు చర్యలకు పూనుకోకపోవడం చూస్తుంటే ఈ ఎన్నికల్లోనూ పరాభవం తప్పదనే సంకేతాలే వెలువడుతున్నాయి. కాంగ్రెస్జిల్లా అధ్యక్షుడు చల్లా నర్సింహారెడ్డి గాంధీభవన్‌లోని జిల్లా కార్యాలయంలో ప్రెస్మీట్‌కు హాజరవడం.. బడంగ్పేట్, బాలాపూర్ చౌరస్తాలో కార్యక్రమాల్లో పాల్గొనడం తప్ప, పెద్ద ఎత్తున ప్రజా సమస్యలపై పోరాడిన దాఖలాలు లేవు. ఈ ప్రభావం స్థానిక సంస్థల ఎన్నికల్లో కనబడింది. పైగా జీహెచ్‌ఎంసీలో 150 డివిజన్లుంటే రంగారెడ్డి జిల్లాలోనే 45 డివిజన్లుండటం విశేషం. శేరిలింగంపల్లి, రాజేంద్రనగర్, ఎల్బీనగర్, మహేశ్వరం, ఇబ్రహీంపట్నం అసెంబ్లీ నియోజకవర్గాల్లోని పట్టణప్రాంతాలు జీహెచ్ఎంసీ పరిధిలోనే ఉన్నాయి. అయితే ఎల్బీనగర్ నియోజకవర్గం ఇన్‌చార్జిగా వ్యవహరించిన సుధీర్ రెడ్డి కాంగ్రెస్ నుంచి ఎమ్మెల్యేగా గెలుపొంది టీఆర్‌ఎస్‌లో చేరారు. మహేశ్వరం ఇన్‌చార్జిగా వ్యవహరించిన సబితా ఇంద్రారెడ్డి సైతం కాంగ్రెస్ నుంచి ఎమ్మెల్యేగా ఎన్నికై టీఆర్‌ఎస్‌లో చేరి మంత్రి పదవి దక్కించుకున్నారు. ఆమె కుమారుడు, రాజేంద్రగనర్ ఇన్‌చార్జి కార్తీక్ రెడ్డి కూడా టీఆర్ఎస్‌లోకి వెళ్లారు. దీంతో జీహెచ్ఎంసీ ఎన్నికల్లో బరిలోకి దిగే అభ్యర్థులకు నాయకత్వ భరోసా లేకపోవడంతో.. పోటీ చేయాలా వద్దా అనే సందిగ్ధంలో ఉన్నట్టు సమాచారం.
Read also..
