కోటి దీపోత్సవానికి వెళ్లాలి అనుకుంటున్నారా..? రూల్స్ ఇవే!

దిశ, డైనమిక్ బ్యూరో : కార్తీక మాసం సందర్భంగా భక్తి టీవీ ఆధ్వర్యంలో నిర్వహించే కోటి దీపోత్సవానికి రంగం సిద్ధమైంది. మహిళలంతా ఏకమై శివనామ స్మరణల మధ్య జరిగే దీపోత్సవం గత ఏడాది కరోనా కారణంగా నిలిపివేసిన విషయం తెలిసిందే. కరోనా ప్రభావం తగ్గిపోవడంతో ఈ ఏడాది కోటి దీపోత్సవం నిర్వహించనున్నారు. ఈనెల 12న సాయంత్రం 5.30 గంటలకు జరిగే కోటి దీపోత్సవ ప్రారంభోత్సవానికి హైదరాబాద్‌లోని ఎన్టీఆర్ స్టేడియం ముస్తాబవుతోంది. ఈ కార్యక్రమాలు ఈ నెల 12 వ తేది నుంచి 22 వ తేది వరకు జరగనున్నాయి.

ఇందులో భాగంగా ప్రతి రోజు కార్తీకమాసంలో చేయాల్సిన ప్రత్యేక పూజలు, వ్రతాలు, ప్రవచనామృతాలు వంటి కార్యక్రమాలు నిర్వహిస్తూ కార్తీకమాసం ప్రాముఖ్యతను పీఠాధిపతులు, సద్గురువులు, ఆధ్యాత్మిక వేత్తలు వివరించనున్నారు. అయితే, కరోనా దృష్ట్యా కొవిడ్ నిబంధనల మధ్య ఈ కార్యక్రమాన్ని నిర్వహించనున్నారు. ఈక్రమంలో కోటి దీపోత్సవంలో పాల్గొనాల్సిన వారికి కరోనా నెగిటెవ్ సర్టిఫికేట్ లేదా వ్యాక్సినేషన్ సర్టిఫికేట్ తప్పనిసరి చేస్తూ ప్రకటన విడుదల చేశారు. అందువల్ల భక్తులు దీనిని గమనించి, సహకరించాలని కోటి దీపోత్సవం నిర్వాహకులు కోరారు.