శ్రీ సింహాతో రాగ పెళ్లి జరగడం నాకెంతో సంతోషంగా ఉంది.. ప్రముఖ నటుడు ఇంట్రెస్టింగ్ కామెంట్స్

దిశ, సినిమా: కీరవాణి తనయుడు, హీరో శ్రీసింహ రీసెంట్‌గా సీనియర్ యాక్టర్ మురళీ మోహన్ మనవరాలు రాగను పెళ్ళి చేసుకున్న సంగతి తెలిసిందే. అందుకు సంబంధించిన ఫొటోలు, వీడియోలు బయటకు రావడంతో అవి కాస్తా సోషల్ మీడియాలో వైరల్‌గా మారాయి. అయితే తాజాగా ఓ ఇంటర్వ్యూలో పాల్గొన్న మురళీ మోహన్ వీరిద్దరి పెళ్లి గురించి ఇంట్రెస్టింగ్ కామెంట్స్ చేశాడు. ఆయన మాట్లాడుతూ.. ‘నేను శ్రీసింహ- రాగ వివాహ విషయంలో చాలా హ్యాపీగా ఉన్నాను. పెళ్లికి ముందు నుంచే రాగ, శ్రీ సింహాలు మంచి ఫ్రెండ్స్. అలాగే రాజమౌళి కోడలు పూజా, రాగ కూడా మంచి స్నేహితులు. వీలు కుదిరినప్పుడల్లా రాగ వాళ్లింటికి వెళ్లేది.

ఈ క్రమంలో కీరవాణి, రాజమౌళి కుటుంబాలు ఎంత బాగా కలిసి ఉంటున్నాయో ఆమె చూసేది. ఇక చిన్నప్పటి నుంచి రాగకు ఉమ్మడి కుటుంబాలు అంటే ఎంతో ఇష్టం ఉండటంతో వారి కుటుంబాన్ని ఎంతో ఇష్టపడింది. ఓ రోజు శ్రీసింహకు నా మనవరాలే ప్రపోజ్ చేసింది. ఈ విషయాన్ని మొదట్లో మాకు చెప్పలేదు. ఓ సారి మా ఇంట్లో పెళ్లి ప్రస్తావన వచ్చింది. అప్పుడు నీకు నచ్చిన వాళ్ళు ఎవరైనా ఉన్నారా అని అడిగాం. అప్పుడు తన మనసులోని మాట బయటపెట్టింది’ అంటూ మురళి మోహన్ చెప్పుకొచ్చారు. ప్రస్తుతం ఈయన చేసిన కామెంట్స్ నెట్టింట వైరల్‌గా మారాయి.