మంత్రి బుగ్గనకు చేదు అనుభవం..

దిశ, వెబ్‌డెస్క్ : తిరుపతి విమానాశ్రయంలో ఏపీ ఆర్థిక మంత్రి బుగ్గన రాజేంద్రనాథ్ రెడ్డికి చేదు అనుభవం ఎదురైంది. రెండు రోజుల పర్యటనలో భాగంగా కేంద్ర రైల్వేశాఖ మంత్రి పీయూష్ గోయల్ తిరుపతికి వచ్చారు. పర్యటన ముగించుకున్న అనంతరం పీయూష్ గోయల్ ఢిల్లీ వెళ్తుండగా.. విమానాశ్రయంలో వీడ్కోలు చెప్పడానికి మంత్రి బుగ్గన వీఐపీ గేటు వద్దకు రాగా భద్రతా సిబ్బంది లోపలికి అనుమతించలేదు.

ఈ క్రమంలో మంత్రి బుగ్గన లోపలికి ప్రవేశించే ప్రయత్నం చేయగా సిబ్బంది బలంగా నెట్టివేయడంతో కిందపడిపోయే పరిస్థితి చోటుచేసుకుంది. దీంతో తనను అడ్డుకున్న భద్రతా సిబ్బంది వివరాలు ఇవ్వాలని విమానాశ్రయ అధికారులను రాష్ట్ర మంత్రి కోరారు. ఈ సందర్భంగా విమానాశ్రయంలో కొద్దిసేపు ఉద్రిక్త వాతావరణం నెలకొంది.