'చంద్రబాబుది దొంగ దీక్ష .. బాత్ రూమ్‌లో టిఫిన్ తింటాడు'
దిశ, ఏపీ బ్యూరో: రాష్ట్రంలో తెలుగుదేశం పార్టీ కేంద్ర కార్యాలయం..రాష్ట్రంలోని టీడీపీ కార్యాలయాలు..నేతలపై దాడులకు సంబంధించి చంద్రబాబు తీవ్ర ఆగ్రహంగా ఉన్నారు. వైసీపీ నేతల తీరును నిరసిస్తూ టీడీపీ అధినేత చంద్రబాబు గురువారం 36 గంటల పాటు దీక్షకు చేపట్టారు. ‘ప్రభుత్వ ఉగ్రవాదంపై పోరు’ పేరుతో మంగళగిరి టీడీపీ కేంద్ర కార్యాలయంలో దాడి జరిగిన ప్రాంతంలోనే ఈ దీక్ష చేపట్టారు. అయితే చంద్రబాబు దీక్షపై విద్యుత్ శాఖ మంత్రి బాలినేని శ్రీనివాసరెడ్డి తీవ్ర ఆగ్రహం వ్యక్తం చేశారు. చంద్రబాబుది దొంగ దీక్ష అంటూ విమర్శలు చేశారు. గతంలో చంద్రబాబు దీక్షలు చేయడం చూశామని అవన్నీ పేరుకే దీక్షలు అని లోపల జరిగేదంతా వేరంటూ కీలక వ్యాఖ్యలు చేశారు. బాత్ రూమ్ లోకి వెళ్లి టిఫిన్‌లు తిని వస్తారంటూ బాలినేని ఆరోపించారు. గతంలో చంద్రబాబు చేసిన దీక్షలు ఆయనకు షుగర్ లెవెల్స్, బీపీ లెవెల్స్ పెరగడమే అందుకు నిదర్శనమన్నారు. మరోవైపు హోంశాఖ మంత్రి అమిత్‌షాతో చంద్రబాబు భేటీ అవుతారంటూ వస్తున్న వార్తలపై మండిపడ్డారు. ఏ ముఖంపెట్టుకుని చంద్రబాబు.. అమిత్ షాను కలుస్తారంటూ ప్రశ్నించారు. అమిత్ షాపై రాళ్ల దాడి చేయించిన చంద్రబాబు ఇప్పుడు ఎలా కలుస్తారని సిగ్గుందా అంటూ మంత్రి బాలినేని శ్రీనివాసరెడ్డి ప్రశ్నించారు.
