ఒక్కరోజే 253 కొత్త కేసులు.. ఇద్దరు మృతి

దిశ, ఏపీ బ్యూరో: రాష్ట్రంలో కరోనా వైరస్ తీవ్రత ఏమాత్రం తగ్గడం లేదు. రికార్డు స్థాయిలో పాజిటివ్ కేసులు నమోదవుతున్నాయి. తాజాగా, 15,633 శాంపిళ్లను పరీక్షించగా, అత్యధికంగా 253మందికి కరోనా పాజిటివ్‌గా తేలింది. ఈ విషయాన్ని వైద్య ఆరోగ్యశాఖ ఆదివారం వెల్లడించింది. దీంతో రాష్ట్రంలో ఇప్పటివరకు నమోదైన కేసుల సంఖ్య 6,152కు చేరింది. వీరిలో రాష్ట్రానికి చెందినవారు 4,841మంది ఉండగా, ఇతర దేశాల నుంచి వచ్చినవారు 204మంది, ఇతర రాష్ట్రాల నుంచి వచ్చిన వారు 1,107మంది ఉన్నారు.

శనివారం ఉదయం 9గంటల నుంచి ఆదివారం ఉదయం 9గంటల వరకు 82మంది కోలుకుని డిశ్చార్జ్ అవ్వగా, ఇప్పటివరకు డిశ్చార్జ్ అయినవారి సంఖ్య 2,723కి పెరిగింది. వైరస్ బారినపడి కొత్తగా కర్నూల్ జిల్లాకు చెందిన ఒకరు, తూర్పు గోదావరి జిల్లాకు చెందిన ఒకరు మృతిచెందగా, మొత్తం మృతుల సంఖ్య 82కు చేరింది. రాష్ట్రంలో ప్రస్తుతం 1,865 మంది వివిధ ఆస్పత్రుల్లో చికిత్స పొందుతున్నారు.