Breaking: నారా లోకేశ్‌పై బైరెడ్డి సిద్ధార్ధరెడ్డి పోటీ.. కన్ఫాఫ్ చేసిన మాజీ మంత్రి
దిశ, వెబ్ డెస్క్: టీడీపీ జాతీయ ప్రధాన కార్యదర్శి నారా లోకేశ్‌పై మాజీ మంత్రి కొడాలి నాని ఆగ్రహం వ్యక్తం చేశారు. యువగళం పాదయాత్రలో ప్రభుత్వంపై లోకేశ్ చేస్తున్న వ్యాఖ్యలకు ఆయన కౌంటర్ ఇచ్చారు. నారా లోకేశ్ వట్టి అసమర్థుడని కొడాలి విమర్శించారు. యువగళానికి జనాలను అరువు తెచ్చుకుంటున్నారని ఎద్దేవా చేశారు. నారా లోకేశ్‌పై బైరెడ్డి సిద్ధార్ధ రెడ్డిని పోటీకి పెడతామని, దమ్ముంటే గెలవాలని కొడాలి నాని సవాల్ విసిరారు. ఈ వ్యాఖ్యలు ఇప్పుడు చర్చనీయాంశంగా మారాయి.
కాగా నారా లోకేశ్ గత ఎన్నికల్లో గుంటూరు జిల్లా మంగళగిరి నుంచి పోటీ చేసి ఓడిపోయారు. వైసీపీ నుంచి పోటీ చేసిన ఆళ్ల రామకృష్ణారెడ్డి గెలుపొందారు. ఇప్పుడు నారా లోకేశ్ ఇదే నియోజకవర్గం నుంచి పోటీ చేస్తాడా అనే అంశంపై క్లారిటీ లేదు. అయితే అధికార పక్షానికి చెందిన పలువురు నేతలు నారా లోకేశ్‌పై పోటీ చేసేందుకు ఆసక్తి చూపుతున్నట్లుగా తెలుస్తోంది. అంతేకాదు లోకేశ్‌పై ఎవరు పోటీ చేసినా గెలుస్తామనే ధీమా వ్యక్తం చేశారు. అటు నారా లోకేశ్ పై పోటీకి సంబంధించి కొడాలి నాని కీలక వ్యాఖ్యలు చేశారు. కర్నూలుకు చెందిన బైరెడ్డి సిద్ధార్ధ రెడ్డిని పోటీ పెడతామని లోకేశ్ గెలవాలని సవాల్ విసిరారు. మరి ఇందుకు సీఎం జగన్ ఒప్పుకుంటాడా అన్నది తెలియాలంటే కొన్ని రోజులు ఆగాల్సిందే.
