Texas: అమెరికాలో మరోసారి కాల్పుల మోత.. జూన్‌టీన్త్ వేడుకల్లో కాల్పులకు తెగబడ్డ దుండగులు

దిశ, డైనమిక్ బ్యూరో: అగ్రరాజ్యం అమెరికాలో మరోసారి కాల్పుల మోత మోగింది. టెక్సాస్‌ పరిధిలోని ఓ వేడుకల్లో రెండు గ్రూపుల మధ్య ఘర్షణ జరిగింది. ఈ ఘర్షణ కాస్త.. కాల్పుల వరకు రావడంతో ఇద్దరు ప్రాణాలు కోల్పోగా పలువురు తీవ్రంగా గాయపడ్డారు. వివరాల్లోకి వెళితే.. స్థానిక కాలమానం ప్రకారం శనివారం రాత్రి ఆస్టిన్‌ సమిపంలోని రౌండ్ రాక్ ఓల్డ్ సెటిలర్స్ పార్కులో జూన్‌టీన్త్ అనే ఈవెంట్ నిర్వహించారు. దీంతో ఈవెంట్‌కు సమీపంలో రెండు గ్రూప్‌ల మధ్య వివాదం చోటు చేసుకుంది. దీంతో ఓ వర్గం మరో వర్గంపై కాల్పులకు తెగబడింది. ఈ ఘటనలో ఇద్దరు ప్రాణాలు కోల్పోయారు.

వెంటనే సమాచారం అందుకున్న స్థానిక పోలీసులు, అగ్నిమాపక సిబ్బంది ఘటనా స్థలానికి చేరుకున్నారు. అప్పటికే నిందులు పరారయ్యారు. దీంతో గాయపడిన వారిని వెంటనే పోలీసులు ఆస్పత్రికి తరలించారు. కాగా, ఈ ఘటనపై పోలీసులు కేసు నమోదు చేసుకోని నిందితుల కోసం గాలిస్తున్నారు. అయితే ఈ వేడుకల్లో స్థానికులు ఎక్కువ సంఖ్యలో పాల్గొన్నట్లు.. ఈ క్రమంలోనే విచారణ సాగిస్తున్నట్లు అధికారులు చెప్పుకొచ్చారు.