నార్లపూర్‌లో విషాదం.. వాగులో పడి ఇద్దరు యువకులు గల్లంతు

దిశ, పరకాల: వరంగల్ జిల్లా నడికూడ మండలం నార్లపూర్ గ్రామంలో విషాదం చోటుచేసుకుంది. ప్రమాదవశాత్తు వాగులోపడి ఇద్దరు యువకులు గల్లంతు అయ్యారు. స్థానికుల వివరాల ప్రకారం.. మంగళవారం గ్రామానికి చెందిన ఈర్ల కొమురయ్య అనే వ్యక్తి మరణించగా, అంత్యక్రియల కోసం కుటుంబసభ్యులు, గ్రామస్తులు స్మశాన వాటికకు వెళ్లారు. ఈ క్రమంలో సోమవారం కురిసిన భారీ వర్షానికి వాగు ఉధృతంగా ప్రవహిస్తోంది. దీంతో వాగు దాటుతుండగా ఈర్ల అభినయ్, కౌశిక్‌ అనే ఇద్దరు యువకులు ప్రమాదవశాత్తు వాగులో పడిపోయారు.

ఉధృతంగా ప్రవహిస్తుండటంతో ఇద్దరూ గల్లంతయ్యారు. ఈ ఘటనతో నార్లపూర్ గ్రామంలో విషాదఛాయలు అలుముకున్నాయి. సమాచారం అందుకున్న పోలీసులు అక్కడికి చేరుకొని పరిస్థితిని సమీక్షిస్తున్నారు. సుమారు రెండు గంటల పాటు వెతికినా ఫలితం లేకపోవడంతో, రెస్క్యూ టీమ్‌ను రంగంలోకి దింపేందుకు పోలీసులు ప్రయత్నిస్తున్నారు. పూర్తి వివరాలు ఇంకా తెలియాల్సి ఉంది.