నిద్రిస్తున్న వ్యక్తులే వారి టార్గెట్.. నిద్ర లేచే వరకు మాయం..

దిశ, మిర్యాలగూడ: నిద్రిస్తున్న వారి సెల్‌ఫోన్‌‌లు దొంగిలిస్తున్న ఇద్దరు వ్యక్తులను బుధవారం టూ టౌన్ పోలీసులు పట్టుకున్నారు. సీఐ నిగిడాల సురేష్ తెలిపిన వివరాల ప్రకారం.. మహబూబ్‌నగర్ జిల్లా వట్టిపల్లి‌కి చెందిన మూడవత్ వెంకటేష్, గుంటూరు జిల్లా పిల్లుట్ల గ్రామానికి చెందిన కూరపాటి బాజీ సైదా‌లు జట్టుగా ఏర్పడి దొంగతనాలకు పాల్పడుతున్నారు. వీరు హనుమాన్ పేట ఫ్లైఓవర్ బ్రిడ్జి వద్ద నిద్రిస్తున్న లారీ డ్రైవర్ల సెల్ ఫోన్‌లు అలాగే అశోక్‌నగర్ అయ్యప్ప దేవాలయంలో నిద్రిస్తున్న స్వాములకు చెందిన 10 సెల్ ఫోన్లు దొంగతనం చేశారని తెలిపారు.

బుధవారం ఉదయం ఎస్సై శివకుమార్ హాలియా వెళ్తున్న ఆటో తనిఖీ చేయగా అనుమానాస్పదంగా ఇద్దరు పట్టుబడ్డారు. పోలీస్‌ల విచారణలో వీరు దొంగతనం చేసినట్లు నేరం ఒప్పుకున్నారు. దొంగిలించిన 10సెల్ ఫోన్‌లతో పాటు వీరిద్దరి సెల్‌ఫోన్‌లను కూడా పోలిస్‌లు స్వాధీనం చేసుకున్నారు. అనంతరం వీరిని రిమాండ్‌కు తరలించినట్లు సీఐ పేర్కొన్నారు.