టోల్ గేట్ డబ్బులు అడిగితే.. ఇలా ప్రవర్తించాలా? ( వీడియో)

దిశ, డైనమిక్ బ్యూరో: ఉత్తరప్రదేశ్‌లో టోల్ గేట్ వద్ద డబ్బులు అడిగినందుకు కారుతో ఢీ కొట్టిన ఘటన తాజాగా సోషల్ మీడియాలో వైరల్‌గా మారింది. టోల్ ప్లాజా మేనేజర్ చెప్పిన ప్రకారం.. సోమవారం సాయంత్రం ఢిల్లీ- మీరట్ ఎక్స్‌ప్రెస్ హైవేపై ఉన్న కాశీ టోల్ ప్లాజా ఢిల్లీ నుంచి వస్తున్న ఓ కారుకు ఫాస్టాగ్ లేకపోవడంతో డబ్బులు చెల్లించాలని సిబ్బంది కారు డ్రైవర్‌ను అడిగారు. ఈ క్రమంలోనే కారు డ్రైవర్ సిబ్బందితో వాగ్వాదానికి దిగాడు. అంతే కాకుండా దుర్భాషలాడుతూ ముందు నిల్చున్న మహిళని కారుతో ఢీ కొట్టి వెళ్లిపోయాడు.

ఈ ఘటనలో ఆమెకు తీవ్ర గాయాలయ్యాయి. వెంటనే ఆమెను స్థానిక ఆసుపత్రికి తరలించారు. టోల్ ప్లాజా మేనేజర్ అనిల్ శర్మ కారు డ్రైవర్‌పై పోలీసులకు ఫిర్యాదు చేశాడు. నిందితుడిని గుర్తించడానికి టోల్ బూత్ నుంచి సీసీటీవీ ఫుటేజీని తెప్పించుకొని పోలీసులు దర్యాప్తు చేస్తున్నారు.