నిస్సహాయ స్థితిలో రామ్.. అభిమానులకు థాంక్స్

దిశ, సినిమా : కోలీవుడ్ స్టార్ డైరెక్టర్ లింగుస్వామి దర్శకత్వంలో రామ్, కృతి శెట్టి జంటగా తెరకెక్కిన చిత్రం 'ది వారియర్‌'. ఈ సినిమా ప్రీ రిలీజ్ ఈవెంట్‌ను ఆదివారం హైదరాబాద్‌లో నిర్వహించారు. ఈ సందర్భంగా మాట్లాడిన రామ్ ముందుగా తన అభిమానులకు ధన్యవాదాలు తెలిపాడు. ఎందుకంటే.. ఈ మూవీ కోసం రామ్ జిమ్‌లో కసరత్తులు చేస్తూ గాయపడితే డాక్టర్స్ ఒక కిలో కన్నా ఎక్కువ బరువు మోయొద్దని సూచించారట. అయితే ఇలాంటి నిస్సహాయ స్థితిలో ఉన్నప్పుడు అభిమానులు తనకు చాలా సపోర్టివ్‌గా ఉన్నారని రామ్ వెల్లడించాడు.

'విపరీతమైన ప్రెజర్‌లో ఉన్నప్పుడు చాలామంది ఫ్యాన్స్ తమ మెసేజ్‌లతో నన్ను చాలా మోటివేట్ చేశారు. ఈ విధంగా నాపై ఎనలేని ప్రేమను చూపిస్తున్నందుకు నా అభిమానులందరికీ కృతజ్ఞతలు' అని చెప్పాడు. ఇంకా మాట్లాడుతూ.. 'యోధుడి ప్రయాణం భిన్నంగా ప్రారంభమైంది. నేను కాప్ స్టోరీ చేయాలని ఫిక్స్ అయినప్పటికీ ఏ స్క్రిప్ట్ నచ్చకపోవడంతో బాధపడ్డాను. ఇక వదిలేద్దామని డిసైడ్ అవుతున్న క్రమంలో లింగుస్వామి సర్ చెప్పిన కథకు స్పెల్‌బౌండ్ అయ్యాను' అని తెలిపాడు రామ్.